ޤައުމީ އެއަރލައިން މޯލްޑިވިއަނުން ބައެއް ސަރަހައްދުތަކުން އެކްސެސް ބެގޭޖަށް ނަގާ ފީ ބޮޑުކޮށްފި އެވެ.

މޯލަޑިވިއަނުން މިއަދު ކުރި އިއުލާނެއްގައި ބުނެފައިވަނީ މި ޑިސެމްބަރު މަހުގެ 7 ވަނަ ދުވަހުން ފެށިގެން އެކްސެސް ބެގޭޖްގެ ގޮތުގައި ކޮންމެ ކިލޯއަކަށް 3.11 ޑޮލަރު ނަގާނެކަމަށެވެ.

އެކްސެސް ބެގޭޖަށް ނަގާ ފީ ބޮޑުކޮށްފައިވަނީ މާވަރުލު އެއާޕޯޓާއި، ކޫއްޑޫ އެއާޕޯޓާއި ކާޑެއްދޫ އެއާޕޯޓަށް މޯލްޑިވިއަނުން ކުރާ ދަތުރުތަކުންނެވެ.

މޯލްޑިވިއަނުން އެކްސެސް ބެގޭޖަށް ނަގާ ފީ ބޮޑުކޮށްފައިވާއިރު އަންނަ ޖެނުއަރީ 1 ވަނަ ދުވަހުންފެށިގެން ޓީޖީއެސްޓީ 12 ޕަސެންޓުން 16 ޕަސެންޓަށް ބޮޑު ކުރަން މަޖިލީހުން ވަނީ ފާސްކޮށްފައެވެ.

އަންނަ އަހަރުން ފެށިގެން ޖީއެސްޓީ އާއި ޓީޖީއެސްޓީ ބޮޑުކޮށް އަދި ސަބްސިޑީ ދޭ އުސޫލަށް ބަދަލު ގެންނަން ސަރުކާރުން ނިންމާފައިވާ ނިންމުމަށް ރާއްޖޭގެ ސިޔާސީ ފަރާތްތަކުން ގެންދަނީ ފާޑުކިޔަމުންނެވެ. ނަމަވެސް ބައިނަލްއަގްވާމީ މާލީ އިދާރާތައް ކަމަށްވާ އިންޓަނޭޝަނަލް މަނިޓަރީ ފަންޑު (އައިއެމްއެފް) އާއި ވޯލްޑް ބޭންކުން ވަނީ އެ ނިންމުމަށް ތާއިދުކޮށްފަ އެވެ.