ޑްރަގް ޑީލް ކުރުމުގައި ސިޔާސީ މީހުން އުޅޭ ކަމަށް ތުހުމަތު ކުރަށްވައި ޕީއެންސީގެ ނާއިބް ރައީސް އަދި މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވާހަކަފުޅުދައްކަވައިފިއެވެ.

ކުރީގެ ޑިފެންސް މިނިސްޓަރ އާދަމް ޝަރީފް ޢުމަރު މިމޭރުމުން ވާހަކަފުޅު ދައްކަވާފައިވަނީ ނޭޝަނަލް ޑްރަގް އޭޖެންސީ (އެންޑީއޭ)ގެ ހިންގުން ހަރުދަނާކުރުމަށް މަސައްކަތްތަކެއް ފަށައިގެން ކުރިއަށްދާ ކަމަށް އެ މުއައްސަސާގެ އާ ސީއީއޯ އިމާދު ޞާލިޙް ވިދާޅުވުމާ ގުޅިގެންނެވެ.

އިމާދުގެ ވާހަކަފުޅާ ގުޅިގެން އާދަމް ޝަރީފް ވިދާޅުވީ މަސްތުވާތަކެތީގެ މައްސަލައަށް ހައްލެއް ލިބޭނީ ސިޔާސީ މީހުންނާއި ވެރިން އެކަން ހުއްޓުވުމަށް އިޚްލާސްތެރިކަމާއެކު މަސައްކަތް ކޮށްގެން ކަމަށެވެ. ނަމަވެސް މަސްތުވާތަކެތި ޑީލް ކުރުމުގައި ސިޔާސީ މީހުން އުޅޭކަމަށް އާދަމް ޝަރީފް ތުހުމަތު ކުރެއްވިއެވެ.

"ޑްރަގް ޑީލް ކުރުމުގައި ބައެއް މަޖިލީސް މެންބަރުންނާއި ސިޔާސީ ބައެއް މީހުން އުޅޭކަން އެންމެނަށް އެނގޭ. އެމީހުނަށް ވޯޓޫ ނުދީ." އާދަމް ޝަރީފް ވިދާޅުވެފައިވެއެވެ.

އާދަމް ޝަރީފް ވަނީ ރައްޔިތުން ވޯޓު ދިނުމުގައި ކޮމްޕްރޮމައިޒް ނުވާނެ މީހުން ހޮވުމަށް އިލްތިމާސް ކުރަށްވާފައެވެ.

ރާއްޖޭގައި މަސްތުވާތަކެތީގެ ޙާލަތު ގޯސްވެފައިވާއިރު އެންޑީއޭގެ ސީއީއޯ އިމާދު ވިދާޅުވެފައިވަނީ މަސްތުވާތަކެއްޗާ ދެކޮޅަށް މަސައްކަތް ކުރުމަކީ ހަމައެކަނި އެންޑީއޭގެ މަސްއޫލިޔަތެއްކަމަށް ދުށުމުގެ ވިސްނުން ދޫކޮށްލަންޖެހޭ ކަމަށެވެ. އޭގެ ބަދަލުގައި އެއީ ކޮންމެ ގޭބިސީއަކާއި ސްކޫލް، މަދަރުސާތަކުން އެޑްރެސް ކުރަން ޖެހޭ ކަމެއްކަމަށް އިމާދު ވިދާޅުވިއެވެ.

އިމާދު ވިދާޅުވީ އެންމެ މުހިއްމު ކަމަކީ މަސްތުވާތަކެއްޗާމެދު މީހުންގެ ހޭލުންތެރިކަން އިތުރުކުރުން ކަމަށެވެ.