ޕާކިސްތާނުން ރާއްޖެއަށް އެތެރެކުރި 21 މިލިއަން ރުފިޔާގެ ޑްރަގް ކަސްޓަމްސުން އަތުލައިގެންފިއެވެ.

ކަސްޓަމްސުން މިއަދު ބުނީ ޕާކިސްތާނުން ރާއްޖެއައި އެގައުމުގެ ރައްޔިތެއްގެ އަތުން 17.26 ކިލޯގެ މަސްތުވާތަކެތި އަތުލައިގެންފައިވާ ކަމަށެވެ.

މި މަސްތުވާތަކެތި އަތުލައިގަނެފައިވަނީ މިދިޔަ ސެޕްޓެމްބަރު 18 ވަނަ ދުވަހު ވައިގެ މަގުން ރާއްޖެއައި ޕާކިސްތާންގެ ރައްޔިތަކާއި މެދު ޝައްކުކުރެވިގެން، އެފަސިންޖަރުގެ ލަގެޖް ބަލައިފާސްކުރުމުގެ ތެރޭގައި ކަމަށް ކަސްޓަމްސުން މަޢުލޫމާތު ދީފައިވެއެވެ.

“ޢުމުރުން 30 އަހަރުގެ ޕާކިސްތާނު މީގެ އަތުން އަތުލައިގަތް މަސްތުވާތަކެތި ފުރަތަމަ މަރުހަލާގައި ކަސްޓަމްސުން ތަޙުލީލުކުރި އިރު، މަސްތުވާތަކެތީގެ ބާވަތެއް ކަމަށްވާ ހިރޮއިން އަށް ވަނީ ޕޮޒިޓިވް ވެފައެވެ.” ކަސްޓަމްސުން ބުނެފައިވެއެވެ.

ކަސްޓަމްސުން ބުނީ މިތަކެތީގެ މަގުމަތީ އަގު އެކާވީސް މިލިއަން ރުފިޔާއަށް އަރާކަމަށެވެ. އަދި މިއީ މިއަހަރުގެ މިހާތަނަށް މިބާވަތުގެ މަސްތުވާތަކެތި ރާއްޖެ އެތެރެކުރަން އުޅެނިކޮށް އަތުލައިގަނެފައިވާ ހަ ވަނަ ފަހަރު ކަމަށްވެސް ކަސްޓަމްސުން ވަނީ ބުނެފައެވެ.

މިގޮތުން މިއަހަރުގެ މިހާތަނަށް ޖުމްލަ 55.405 ކިލޯގެ ހެރޮއިން އަތުލައިގެންފައިވާ ކަމަށާއި މިމައްސަލައިގައި ޝާމިލްވާ މީހާއާއި އަތުލައިގަނެވުނު މަސްތުވާތަކެތި ފުލުހުންނާއި ހަވާލުކޮށްފައިވާކަމަށް ކަސްޓަމްސުން މަޢުލޫމާތު ދީފައިވެއެވެ.