ފުލުހުން އަތުލައިގަތް 13 ކިލޯ މަސްތުވާތަކެތީގެ މައްސަލާގައި ތުހުމަތުކުރެވޭ 6 މީހުންގެ ބަންދުގެ މުއްދަތު އިތުރުކޮށްފިއެވެ.

ފުލުހުން ބުނީ 13 ކިލޯގެ މަސްތުވާ ތަކެއްޗާއެކު މިދިޔަ ނޮވެމްބަރު މަހުގެ 18 ވަނަ ދުވަހު ހައްޔަރުކުރި 6 މީހުންގެ ބަންދާއިމެދު ގޮތެއް ނިންމަން ކޯޓަށް ހާޒިރުކުރުމުން ކޮންމެ މީހެެއްގެ ބަންދަށްވެސް ފުރަތަމަ ޖަހައިދިނީ 15 ދުވަސް ކަަމަށެވެ.

މިމައްސަލާގައި ފުލުހުން ހައްޔަރުކުރި މީހުންގެ ބަންދުގެ މުއްދަތު ހަމަވެ، މުއްދަތު އިތުރުކުރުމަށް ކޯޓަށް ގެންދިއުމުން މީގެ ތެރެއިން އެކަކު ޝަރީއަތް ނިމެންދެން ބަންދުކުރުމަށް ކޯޓުން ވަނީ އަމުރުކޮށްފައެވެ. އަދި އަނެއް ފަސްމީހުން 30 ދުވަހަށް ބަންދުގައި ބޭތިއްބުމަށް ވަނީ މުއްދަތު ދީފައެވެ.

މިއެންމެންނަކީވެސް ދިވެހި ފިރިހެނުންނެވެ. ނަމަވެސް އެމީހުންގެ ވަނަވަރު މިހާތަނަށް ފުލުހުން ހާމަކޮށްފައެއް ނުވެއެވެ.

ފުލުސް ކޮމިޝަނަރ މުޙައްމަދު ޙަމީދު ވިދާޅުވީ 644،020 ރުފިޔާ އާއިއެކު 13 ކިލޯގެ މަސްތުވާތަކެތި ފުލުހުން އަތުލައިގަތީ މާލޭގެ ދެ ގެއަކާއި ހުޅުމާލޭގެ ގެސްޓްހައުސްއެއް ފާސްކުރުމަށްފަހު ކަމަށެވެ.

ފަހަކަށް އައިސް ފުލުހުން ގެންދަނީ މަސްތުވާތަކެތީގެ އޮޕަރޭޝަންތަކުގައި ގިނަ ޢަދަދެއްގެ މަސްތުވާތަކެތި އަތުލައިގަންނަމުންނެވެ.