ކްރޮސް ސަބްސިޑީގެ އުސޫލުން މަޝްރޫއުތަކަށް ފައިސާ ދިނުމުން ބަދަލުގައި ރަށެއް ދޭ އަގު އެއް މިލިއަން ޑޮލަރަށް ކުޑަކޮށްފިއެވެ.

ކްރޮސް ސަބްސިޑީގެ ގޮތުގައި ފަތުރުވެރިކަމުގެ ބޭނުމަށް ރަށް، ބިން ނުވަތަ ފަޅު ކުއްޔަށް ދިނުމާބެހޭ ގަވާއިދަށް އަލަށް ގެނައި އިސްލާހުގައި ބަޔާންކޮށްފައިވަނީ ކުއްޔަށް ހިފުމަށް ހުށަހަޅައިފައިވާ ފަރާތުން މަޝްރޫއަށް ހަރަދުކުރަން ކަނޑައަޅައިފައިވާ ފައިސާގެ ޖުމުލަ އަދަދުގެ ތެރެއިން މަދުވެގެން އެއް މިލިއަން ޑޮލަރު ދައުލަތަށް ދައްކައިފައިވާނަމަ އެއްބަސްވުމުގައި ސޮއިކުރެވިދާނެ ކަމަށެވެ.

މި ޤަވާއިދުގައި ކުރިން ބަޔާން ކޮށްފައިވަނީ އެގޮތަށް ތަނެއް ދެވޭނީ މަސައްކަތް ނިމުމުން ނުވަތަ މަޝްރޫއުގެ ތެރެއިން، ހަވާލުވާ ފަރާތުން ކުރަން ކަނޑައަޅައިފައިވާ މަސައްކަތް އެއްކޮށް ނިންމަން ބޭނުންވާ ޖުމުލަ ފައިސާ، ދައުލަތާ ހަވާލުކުރުމުން ކަމުގައި އެ ތަނެއްގެ ކުލީގެ އެއްބަސްވުމުގައި ބަޔާންކޮށްފައި އޮންނަން ޖެހޭނެ ކަމަށެވެ.

ރާއްޖޭގެ 6 ސަރަހައްދެއްގައި މުޅި އެއަރޕޯޓު ތަރައްގީ ކުރުމަށް ނުވަތަ ފައިނޭންސް ކުރުމަށް ޕްރޮޕޯސަލް ހުށަހެޅުމުގެ ފުރުސަތު ސަރުކާރުން ވަނީ ހުޅުވާލާފައެވެ. ނަމަވެސް ފަހުން ވަނީ މުޅި އެއަރޕޯޓް ތަރައްގީކުރުމަށް ނުވަތަ އެއިން ބައެއް ތަރައްގީކުރުމަށް ފައިނޭންސް ކުރުމަށް ހުށައެޅޭގޮތަށް ބަދަލު ގެނެސްފައެވެ.

އަތޮޅުތެރޭގައި އެޅުމަށް ނިންމާފައިވާ ހަ އެއާޕޯޓް ތަރައްގީ ކުރުމަށް ބޭނުންވާ ފައިސާގެ ތެރެއިން ބައެއް ހޯދުމަށް ބައެއް ކުންފުނިތަކާއެކު ސަރުކާރުން ވަނީ އެއްބަސްވުންތަކެއް ހަދާފައެވެ.

ކްރޮސް ސަބްސިޑީގެ ގޮތުގައި ދޫކުރަން ސަރުކާރުން އިއުލާންކޮށްފައިވާ ރަށްތަކަކީ ށ.ކުޑަޅައިމެންދުއާއި ނ. ކުންނަމަލެއި އާއި ޅ. މެއްޔަފުއްޓާއި ތ. ދިއްފުއްޓާއި ތ. ކަޅުފަހަލަފުއްޓާއި ގއ. ފުލަނގި އެވެ.