ކުވެއިތު ފަންޑުގެ އެހީގައި ރާއްޖޭގެ 7 ރަށެއްގައި ހޮސްޕިޓަލް އަޅަން ނިންމައި އެމަސައްކަތް ކޮށްދޭނެ ބަޔަކު ހޯދުމަށް އަނެއްކާވެސް އިޢުލާނުކޮށްފިއެވެ.

ރާއްޖޭގެ 7 ރަށެއްގައި ހޮސްޕިޓަލް އެޅުމަށް ކުވައިތު ފަންޑުން ދިނުމަށް ހަމަޖެހިފައިވާ އެހީ ލިބިފައިވާކަމަށް މިނިސްޓަރ އޮފް ހެލްތު އަޙުމަދު ނަސީމް އެންމެ ފުރަތަމަ ވިދާޅުވީ މިދިޔަ އޭޕްރީލް މަހު އެވެ.

އެގޮތުން 30 އެނދުގެ 7 ހޮސްޕިޓަލް އިމާރާތްކުރާނެ ބަޔަކު ހޯދުމަށް ފިނޭންސް މިނިސްޓްރީން އިއްޔެ ވަނީ ދެވަނަ ފަހަރަށް އިއުލާންކޮށްފައެވެ. މި ބީލަންތަކުގައި ބައިވެރިވުމަށް އަންނަ މަހުގެ ފަސް ވަނަ ދުވަހުގެ ކުރިން މައުލޫމާތު ސާފުކުރަން ޖެހެއެވެ. އަދި ބިޑް ހުޅުވުމަށް ހަމަޖެހިފައިވަނީ އަންނަ މަހުގެ 19 ވަނަ ދުވަހެވެ.

ކުވެއިތު ފަންޑް ފޯރ އަރަބް އިކޮނޮމިކް ޑިވެލޮޕްމަންޓް (ކޭ.އެފް.އޭ.އީ.ޑީ)ގެ އެހީގެ ދަށުން ކުރިޔަށްގެންދިއުމަށް ހަމަޖެހިފައިވާ މި މަޝްރޫޢުގައި ހޮސްޕިޓަލް ޢިމާރާތް ކުރުމަށް ހަމަޖެހިފައިވާ ރަށްތަކަކީ ހދ.ހަނިމާދޫ އާއި ށ.މިލަންދޫ އާއި ނ.ވެލިދޫއާއި ކ.ތުލުސްދޫ އާއި އދ.މާމިގިއްޔާއި ވ.ފެލިދޫގެ އިތުރުން ތ.ވިލުފުއްޓެވެ.

މި މަސައްކަތަށް ޝަރުތުހަމަވާ ފަރާތެއް ހޯދުމުގެ ކަންތައް ކުރިޔަށް ގެންދެވޭނީ އިންޓަރނޭޝަނަލް ކޮމްޕެޓިޓިވް ބިޑިންގ (އައި.ސީ.ބީ) އުސޫލުގެ މަތިން ކަމަށް ފިނޭންސް މިނިސްޓްރީން މަޢުލޫމާތުދެއެވެ. އަދި ކޮންމެ ހޮސްޕިޓަލަކަށް ބިޑް ސެކިޔުރިޓީގެ ގޮތުގައި 35،000 އެމެރިކާ ޑޮލަރު ނުވަތަ އެއާ އެއްވަރުގެ އަދަދެއް ދިވެހި ރުފިޔާއިން ހުށަހަޅަންޖެހޭނެއެވެ.

ރާއްޖޭގެ އެކި ހިސާބުތަކުގައި 25 ހޮސްޕިޓަލެއް އެޅުމަށް މަސައްކަތް ފަށާނެކަމަށް ހެލްތު މިނިސްޓްރީން ވަނީ ބުނެފައެވެ.