އައްޑޫގެ ބިންހިއްކަން ފެށުމަކީ އެތައް ދުވަހެއްގެ ބުރަމަސައްކަތެއްގެ ހެޔޮ ނަތީޖާކަމަށް އައްޑޫ މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.

އައްޑޫ ސިޓީ ބިން ހިއްކުމުގެ މަސައްކަތް އިއްޔެ ހެނދުނު ފަށާފައިވާއިރު އައްޑޫގެ ތަރައްޤީގެ މާސްޓަރ ޕްލޭނަށް ބޭނުންވާ ބިން ހިއްކުމުގެ ޢަމަލީ މަސައްކަތް ކުރަމުން އަންނަނީ ނެދަލޭންޑްސްގެ ވެންއޫޑް ނަމަކަށް ކިޔާ ކުންފުންޏަކުންނެވެ.

އައްޑޫ ސިޓީގެ ބިން ހިއްކަން ފެށުމާ ގުޅިގެން މެންބަރު ޝަރީފް ވިދާޅުވީ އައްޑޫގެ ބިންހިއްކުމުގެ މަޝްރޫޢު ލަސްވެގެން ދިޔައީ އެމްޑީޕީގެ އެތެރެއާއި ބޭރުން ކުރިމަތިވި ގިނަ ގޮންޖެހުންތަކެއްގެ ސަބަބުން ކަމަށެވެ.

“އެހެނަސް އިރާދަފުޅާއެކު ކާމިޔާބަކާއި ހަމައަށް ދެވިއްޖެ. ޝުކުރިއްޔާ ރައީސް ޞާލިޙް.” ޝަރީފް ވިދާޅުވެފައިވެއެވެ.

Addu City ge bin hikkumuge amalee masakkaiy feshumakee ethah dhuvaheege bura massakathuge heyo natheejaa.Mimashroou kuriyah gendhiumah MDPge ethere aai beyrun gina gonjehun thakaa huras kurimathi kuri.Ehenas iraadhafulhaa eku kaamiyaabakaai hama ah dhevijje. Shukuriyyaa @ibusolih

— Ibrahim Shareef (@AdduShareef) January 5, 2023

އައްޑޫ ސިޓީ ކައުންސިލުން ބުނީ އައްޑޫ ބިން ހިއްކުމުގެ އަމަލީ މަސައްކަތުގެ ތެރެއިން އެންމެ ފުރަތަމަ ފެށީ އައްޑޫގައި އޮންނަ ހަންކެޑެ ސަރަޙައްދުގެ ދެކޮޅުން ހިލަ ޖެއްސުމާއި ވެލި އެޅުމުގެ މަސައްކަތް ކަމަށެވެ.

ސިޓީ ކައުންސިލުން ލަފާކުރާ ގޮތުގައި އައްޑޫ ބިން ހިއްކުމުގެ މަސައްކަތް އަންނަ ސެޕްޓެމްބަރުމަހަށް ނިންމާލެވޭނެއެވެ.

އިންޑިއާގެ އެގްޒިމް ބޭންކްގެ 800 މިލިއަން ޑޮލަރުގެ ލައިން އޮފް ކްރެޑިޓް (އެލްއޯސީ) ގެ ދަށުން ހިންގާ މި މަޝްރޫއުގެ ދަށުން ޖުމުލަ 194.3 ހެކްޓަރުގެ ބިން ހިއްކަން ވަނީ ނިންމާފައެެވެ. މިއީ 1.3 ބިލިއަން ރުފިޔާގެ މަޝްރޫއެކެވެ.

އެގޮތުން ހިތަދޫން 90 ހެކްޓަރުގެ ބިން ހިއްކުމާއި ހުޅުމީދޫން 23.3 ހެކްޓަރުގެ ބިން ހިއްކުމާއި ޓޫރިޒަމަށް ހާއްސަކޮށްގެން ފަސް ހެކްޓަރުގެ ބިން ހިއްކުން ވެސް މި މަޝްރޫއުގެ ތެރޭގައި ހިމެނެއެވެ. މީގެ އިތުރުން މަރަދޫ/ މަރަދޫފޭދޫން 76 ހެކްޓަރުގެ ބިން ހިއްކުމާއި ޓޫރިޒަމަށް ހާއްސަކޮށްގެން ފަޅުތެރެއިން ހިއްކައިގެން އުފައްދާ 8.3 ހެކްޓަރުގެ ތިން ރަށާއި 3.3 ހެކްޓަރުގެ ދެ ރަށް ހިއްކަން ވެސް ވަނީ ނިންމާފައެވެ.