މިއަހަރުގެ ފުރަތަމަ 25 ދުވަހު ރާއްޖެއަށް ޒިޔާރަތްކުރީ 138،593 ފަތުރުވެރިންކަމަށް ފަތުރުވެރިކަމާބެހޭ ވުޒާރާގެ ތަފާސް ހިސާބުން ދައްކައިފިއެވެ.

ފަތުރުވެރިކަމާބެހޭ ވުޒާރާއިން ހާމަކޮށްފައިވާ މަޢުލޫމާތުން ދައްކާގޮތުގައި އަހަރުގެ ފުރަތަމަ 25 ދުވަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު މިދިޔަ އަހަރުގެ މި މުއްދަތާ އަޅާބަލާއިރު 29.7 އިންސައްތަ ވަނީ އިތުރުވެފައެވެ. މިިދިޔަ އަހަރުގެ މިމުއްދަތުގައި ރާއްޖެއަށް އައިސްފައިވަނީ 106،826 ފަތުރުވެރިންނެވެ.

ތަފާސްހިސާބުތައް ދައްކާގޮތުން މިހާރު އެވްރެޖުކޮށް ދުވާލެއްގެ މައްޗަށް 5،544 ފަތުރުވެރިން ރާއްޖެއަށް ޒިޔާރަތްކުރެއެވެ. އަހަރުގެ މިހާތަނަށް އެންމެ ގިނަ ފަތުރުވެރިން އައިސްފައިވަނީ ރަޝިއާ އިންނެވެ. އެޤައުމުން 19،389 ފަތުރުވެރިން ވަނީ ޒިޔާރަތްކޮށްފައެވެ. އޭގެއިތުރުން އިންޑިއާގެ 14،350 ފަތުރުވެރިންނާއި، އިޓަލީގެ 13،848 ފަތުރުވެރިންނާއި ވެސް ރާއްޖެއަށް ޒިޔާރަތް ކޮށްފައިވެއެވެ.

ތަފާސްހިސާބުތައް ދައްކާގޮތުން މީގެ ކުރިން ރާއްޖެއަށް ގިނަޢަދަދަކަށް ފަތުރުވެރިން ޒިޔާރަތް ކުރަމުންދިޔަ ޗައިނާގެ ބޯޑަރުތައް އަލުން ހުޅުވާލުމާއެކު ޗައިނާ މާކެޓްވެސް މިހާރުވަނީ ވަރަށް ބޮޑަށް ރަނގަޅުވާން ފަށާފައެވެ. އެގޮތުން މިއަހަރު މިހާތަނަށް ޗައިނާގެ 4،477 ފަތުރުވެރިން ރާއްޖެއަށް ޒިޔާރަތް ކޮށްފައިވެއެވެ. ޗައިނާއަކީ މިހާރު ރާއްޖެއަށް 8 ވަނައަށް އެންމެ ގިނަ ޢަދަދެއްގެ ފަތުރުވެރިން ޒިޔާރަތްކުރާ ޤައުމެވެ.

ރާއްޖޭގައި މިހާރު ފަތުރުވެރިންނަށް ޚިދުމަތްދޭ 59،768 އެނދު ތަރައްޤީ ކޮށްފައިވާއިރު، ބައިނަލްއަގުވާމީ 36 އެއާލައިނަކުން ގެންދަނީ ރާއްޖެއަށް ދަތުރުތައް ބާއްވަމުންނެވެ.