ޕީޕިއެމާއި ގުޅުމުން އިދިކޮޅު ކޯލިޝަންގެ އެޑްވައިޒަރަކަށް ރޭ ހަމަޖެއްސި ކުރީގެ ނާއިބް ރައީސް ޑރ.މުހަންމަދު ޖަމީލަކީ "ކިންގް މޭކަރ" ކަމަށް ޕީއެންސީގެ ނާއިބް ރައީސް އާދަމް ޝަރީފް އުމަރު ވިދާޅުވެއްޖެއެވެ.

ކުރީގެ ޑިފެންސް މިނިސްޓަރު އާދަމް ޝަރީފް އުމަރު ކުރެއްވި ޓުވީޓެއްގައި ވިދާޅުވީ، 2013 ގައި ޕީޕިއެމް ވެރިކަމަށް އައިއިރު ޖަމީލް ހުންނެވީ ޕީޕިއެމްގެ ރަނިންމޭޓެއްގެ ގޮތުގައި ކަމަށެވެ. އަދި 2018 ގައި އެމްޑީޕީ ލީޑްކުރާ ކޯލިޝަންގެ ވެރިކަމަށް އައިއިރު ޖަމީލު ހުންނެވީ ކޯލިޝަންގައި އެމްއޯޔޫގެ ރައީސް އަކަށް ކަމަށް މަޖިލީހުގެ މަޑުއްވަރީ ދާއިރާގެ މެމްބަރު ކަން ވެސް ކުރައްވާ އާދަމް ޝަރީފް އުމަރު ވިދާޅުވިއެވެ.

"އިންޝާ ﷲ 2023 ގައި ރައީސް ޔާމިން ވެރިކަމަށް ގެންނަން އެ ހުންނެވީ ޕީޕިއެމްގައި، ޑރ.ޖަމީލަކީ ކިންގ މޭކަރ." އާދަމް ޝަރީފް ވިދާޅުވިއެވެ.

2013 ގައި ރައީސް ޔާމިން އިންތިޚާބު ކާމިޔާބުކުރެއްވުމަށްފަހު މާގިނަ ދުވަހެއް ނުވެ ނާއިބް ރައީސް ކަމުގައި ޑރ.ޖަމީލް ހުންނަވަނިކޮށް މަޖިލިސް މެދުވެރިކޮށް މަގާމުން ވަނީ ވަކިކޮށްފައެވެ. އޭގެފަހުން ޖަމީލް އުޅުއްވީ ރާއްޖެއިން ބޭރަށް އަރުއްވާލެއްވިގެންނެވެ. ބޭރުގައި ހުންނެވި ދުވަސްވަރު ރައީސް ޔާމިންގެ ސަރުކާރާއި ދެކޮޅަށް ވަރުގަދަ އިއްތިހާދެއް ޖަމީލް އިސްވެ ހުންނަވައިގެން އުފެއްދެވިއެވެ. އެ އިއްތިހާދު ލީޑް ކުރެއްވީ ޑރ.ޖަމީލެވެ.

ރައީސް ސޯލިހްގެ ކޯލިޝަންގެ ސަރުކާރު ވެރިކަމަށް ގެނައުމަށް ޑރ.ޖަމީލް ވަރަށް އިސްރޯލެއް އަދާކުރެއްވިއެވެ. ސަރުކާރު ވެރިކަމަށް އައިސް މާގިނަ ދުވަހެއް ނުވެ މިސަރުކާރުގެ ސިޔާސަތުތަކަށް ފާޅުގައި ފާޑުވިދާޅުވެ ކޯލިޝަންގައި އޮތް ޖުމުހޫރީ ޕާޓީއަށް ޖަމީލް ސޮއިކުރެއްވިއެވެ. ޖުމުހޫރީ ޕާޓީގެ އެޑްވައިޒަރ ކަމުގެ މަގާމުގައި ހުންނަވައި ރައީސް ޔާމިންގެ މައްޗަށް އުފުލި މަނީލޯންޑަރ ކުރުމުގެ ދައުވާ އަށް އެމަނިކުފާނުގެ ދިފާއުގައި ޖަމީލް ގާނޫނީ އެހީތެރިކަން ފޯރުކޮށްދެއްވާފައިވެއެވެ. ޖަމީލް ޕީޕިއެމް އަށް ސޮއިކުރެއްވީ ޖުމުހޫރީ ޕާޓީގައި ހުންނެވުމަށް ފަހުއެވެ.