ދަޢުލަތުގެ މާލީ ވުޒާރާގެ ހުއްދަނެތި އާ މަގާމުތައް ނުއުފައްދަން ދަޢުލަތުގެ އިދާރާތަކަށް އަންގައިފިއެވެ.

ދަޢުލަތުގެ މާލީ ވުޒާރާއިން ސަރުކާރުގެ އޮފީސްތަކަށް ފޮނުވާފައިވާ ސަރކިއުލަރއެއްގައި ބުނެފައިވަނީ، މި އަހަރުގެ ބަޖެޓު ތަންފީޒުކުރުމުގައި ޚަރަދުތައް ކުޑަކުރުމަށް ސަރުކާރުގެ ހުރިހާ އޮފީސްތަކުން މަސައްކަތް ކުރުމަށް އެދިލައްވާ ކަމަށެވެ.

އެގޮތުން މާލީ ވުޒާރާގެ ހުއްދަ ނެތި މުސާރައިގެ އޮނިގަނޑަށް ބަލަދުނުގެނައުމަށާއި، ބަޖެޓުން ޚަރަދުކުރާގޮތަށް އެއްވެސް މަޤާމެއް ނުއުފެއްދުމަށް ސަރކިއުލާގައި އަންގަވާފައިވެއެވެ. ހަމައެއާއެކު އައު އެއްވެސް އެލަވަންސެއްވެސް ނުދިނުމަށާއި ޕްރޮމޯޝަންވެސް ނުދިނުމަށް ވަނީ އަންގަވާފައެވެ. އަދި ރަސްމީ ގަޑީގައި އޮފީހުގެ މަސައްކަތްތައް ނިންމޭނެ ގޮތަކަށް މަސައްކަތްތައް ރޭވުމަށާއި ރަސްމީ ގަޑީގެ ބޭރުން ކޮންމެހެން ކުރަންޖެހޭ މަސައްކަތެއް ކުރުމަށް ނޫނީ އިތުރު ގަޑީގައި މަސައްކަތް ނުކުރުމަށް ވެސް ސަރކިއުލާގައި އަންގާފައިވެ އެވެ.

އޭގެ އިތުރުން 35،000 ރުފިޔާއަށް ވުރެ ދަށުގެ ޚަރަދުތައް ބަނޑޭރި ޕޯޓަލްގެ ގުޑްސް އެންޑް ސާވިސަސް ފޯމު މެދުވެރިކޮށް ފައިނޭންސް އެގްޒެކެޓިވްގެ ހުއްދައާއެކު ކުރިއަށް ގެންދަން އަންގާފައިވެ އެވެ. އަދި އެއަށްވުރެ ބޮޑު ހަރަދެއް ކުރާނަމަ ސީދާ މާލީ ވުޒާރާގެ ހުއްދަ ހޯދުމަށް ވެސް ސަރުކާރުގެ އިދާރާތަކަށް ވަނީ އަންގާފައެވެ.

މާލީ ވުޒާރާއިން ބުނެފައިވަނީ ކައުންސިލްތައް ފިޔަވައި ދަޢުލަތުގެ ހުރިހާ އިދާރާއަކުންވެސް އެ ސަރކިއުލަރ އަށް ޢަމަލުކުރަން ޖެހޭނެ ކަމަށެވެ.