ޓޫރިޒަމް މިނިސްޓްރީން މިދިޔަ މަހުގެ 23 ވަނަ ދުވަހު ރިސޯޓު ތަރައްގީކުރަން ބީލަމަށް ހުޅުވާލި 15 ރަށުގެ ތެރޭގައި ހިމެނޭ މ. ބޯހުރާ އެ ލިސްޓުން އުނިކޮށްފިއެވެ.

ޓޫރިޒަަމް މިނިސްޓްރީގެ އިއުލާނަށް ބަދަލު ގެނެސްފައިވަނީ، ރިސޯޓު ތަރައްގީކުރަން ހުޅުވާލި ތަންތަނުގެ ލިސްޓްގައި ރާއްޖޭގެ ރާޅާއަޅާ އެންމެ މަޝްހޫރު އެއް މަންޒިލް ކަމަށްވާ ބޯހުރާ ހިމެނޭތީ އެކަމާ ދެކޮޅަށް މ. މުލީ ރައްޔިތުންނާއި، ކައުންސިލާއި ތިމާވެށީގެ ހިމާޔަތުގައި މަސައްކަތް ކުރާ ބައެއް ޖަމިއްޔާތަކުން އަޑުއުފުލަން ފެށުމުންނެވެ.

ގާތްގަޑަކަށް ތިން ހެކްޓަރުގެ މ. ބޯހުރާއަކީ މ. މުއްޔާއި އެއްފަޅެއްގައި އޮންނަ ރަށެކެވެ. ޓޫރިޒަމް މިނިސްޓްރީން ބުނީ ބޯހުރާގެ ބައުންޑްރީގައި އެރަށާއި ކައިރީގައިވާ، މަޝްހޫރު ސާފް-ޕޮއިންޓް "މަޝްރޫމްސް" ނުހިމެނޭ ކަމަށެވެ. ހަމައެއާއެކު ބޯހުރާގެ އިޚްތިޞާސް ކަނޑައަޅާނީ އެ ސާފް-ޕޮއިންޓް ވަކިކުރުމަށްފަހު ކަމަށް މިނިސްޓްރީން އޭރުވަނީ ބުނެފައެވެ.

އެމައްސަލާގައި ޓޫރިޒަމް މިނިސްޓްރީން ނެރުނު ބަޔާނެއްގައި ބުނެފައިވަނީ ރިސޯޓް ތަރައްގީކުރުމަށް މ. ބޯހުރާ ބީލަމަށް ހުޅުވާލާފައި ވަނީ އެރަށް ހިއްކުމަށް ހުއްދަ ދޭގޮތަށް ނޫން ކަމަށެވެ. އަދި އެރަށް ރިސޯޓެއްގެގޮތުގައި ތަރައްގީކުރާއިރު، ރަށަށް އަރާ ފޭބުމުގެ އިންތިޒާމް ވެސް ހަމަޖައްސާނީ ރިސޯޓް ތަރައްގީކުރާ ފަރާތާއި، މުލީ ކައުންސިލާއި ދެމެދު ވެވޭ އެއްބަސްވުމެއްގެ ދަށުން މުލީ ބަނދަރުން ކަމަށް ވެސް ޓޫރިޒަމް މިނިސްޓްރީން އޭރު ބުންޏެވެ.

އެހެންނަމަވެސް ޓޫރިޒަމް މިނިސްޓްރީން އިއްޔެވަނީ އެ ބިޑުގެ ލިޔެކިޔުންތަކަށް ބަދަލުތަކެއް ގެނެސް، ލިސްޓުން ބޯހުރާ އުނިކޮށް އަލުން އިއުލާންކޮށްފަ އެވެ. އަދި 6 ފެބްރުއަރީގައި ބާއްވަން އޮތް މައުލޫމާތު ސާފުކުރުމުގެ ބައްދަލުވުން 7 ފެބްރުއަރީއަށް ވަނީ ފަސްކޮށްފަ އެވެ.

ޓޫރިޒަމް މިނިސްޓްރީން ފަތުރުވެރިކަމަށް ދޫކުރުމަށް ނިންމާފައިވަނީ ހއ އަލިދުއްފަރުފިނޮޅު، ހއ މެދަފުށި، ހދ ކުޑަފަރުފަސްގަނޑު، ރ އެއްތިގިލި، ކ ކާށިދޫ ފަޅުގެ ސަރަހައްދުން ބައެއް، ފ ނިލަންދޫ ފަޅުގެ ސަރަހައްދުން ބައެއް، ތ އޮޅުފުށި، އޮޅުފުށި ފިނޮޅާއެކު، ތ އޮޅުފުށިފިނޮޅު، ގއ ބޭރުމައުއްޑޫ، ގއ ފުނަދޫވިލިގިއްލާ، ގދ ހާދުއާ، ގދ ކަޅެހުއްޓާ، ގދ ފެރޭތަ ވިލިނގިލި އާއި ގދ. ދެކަނބާ، ކޮޑެރަޓާ، އަދި އިތުރު އެއް ރަށެވެ.

ބީލަމަށް ހުޅުވާލި 14 ރަށުގެ ތެރެއިން އެކުއިޒިޝަން ކޮސްޓްގެ ގޮތުގައި އެންމެ ބޮޑު އެއްޗެއް ދައްކަން ޖެހެނީ ކ. ކާށިދޫ ފަޅާއި ނިލަންދޫ ފަޅަށެވެ. އެގޮތުން ކ. ކާށިދޫ ފަޅުގެ 10 ހެކްޓަރުގެ ސަރަހައްދަކާއި ފ. ނިލަންދޫ ފަޅުން 10 ހެކްޓަރުގެ ސަރަހައްދެއްގައި ރިސޯޓު ތަރައްގީ ކުރަން އެކުއިޒިޝަން ކޮސްޓެއްގެ ގޮތުގައި އެންމެ ދަށްކޮށް 2.2 މިލިއަން ޑޮލަރު (34 މިލިއަން ރުފިޔާ) ހުށަހަޅަން ޖެހެއެވެ.

މި ރަށްތައް ބީލަމަށް ހުޅުވާލާފައި ވަނީ އޯޕަން ބިޑިން މަރުހަލާގެ ދަށުންނެވެ.