ނަފްސާނީ ބަލިތަކަށް ބޭނުން ކުރަމުންދާ "އިމީޕްރާމީން ހައިޑްރަކްލޮރައިޑް" ބޭހުގެ ބެޗެއް ރާއްޖޭގައި ވިއްކުމާއި ބޭނުންކުރުން އެމްއެފްޑީއޭ އިން މަނާކޮށްފި އެވެ.

މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން މިއަދު ކުރި އިއުލާނެއްގައި ބުނެފައިވަނީ ރާއްޖެ އިމްޕޯޓްކޮށް ވިއްކާ ޑޮކްޓަރީ ބޭހުގެ ރައްކާތެރިކަމާއި ފެންވަރު ކަށަވަރު ކުރުމުގެ ގޮތުން ބޭސް ތަހުލީލު ކުރުމުގެ މަސައްކަތް އެ އޮތޯރިޓީން ކުރަމުންދާ ކަމަށެވެ.

އެގޮތުން ކުރެވުނު ތަހުލީލުތަކުގެ ނަތީޖާ ދައްކާގޮތުން، "އިމީޕްރާމީން ހައިޑްރަކްލޮރައިޑް" ބޭހުގެ '2141އެޗް003' ބެޗުގައި ހުންނަންވާ މިންވަރަށް ވުރެ، އެކްޓިވް އިންގްރީޑިއަންޓްގެ މިންވަރު ދަށްކަމަށް ތަހުލީލުތަކުގެ ނަތީޖާއިން ދައްކާކަމަށް އެމްއެފްޑީއޭ އިން ވަނީ ބުނެފައެވެ.



އެހެންކަމުން އެބޭހުގެ އެބެޗު އިމްޕޯޓް ކުރުމާއި، ވިއްކުމާއި، ބޭނުން ކުރުމަކީ މަނާ ކަމެއްކަމަށާއި މާރކެޓްގައި ހުރި މިބެޗްގެ ބޭސް، އެއޮތޯރިޓީގެ ފަރާތުން ނަގަމުން ގެންދާނެކަމަށް އެމްއެފްޑީއޭ އިން މަޢުލޫމާތުދެއެވެ.



އޭގެއިތުރުން މިބޭސް މިހާރުވެސް ބޭނުން ކުރަމުންދާ ފަރާތްތަކުން އެމްއެފްޑީއޭގެ ހޮޓްލައިން ނަންބަރ 7200321 އަށް ގުޅުއްވައިގެން މައުލޫމާތު ހިއްސާކުރުމަށް އެ އޮތޯރިޓީން ވަނީ އެދިފައެވެ.

އިންޑިއާގެ ޓޮރެންޓް ފާމަސޫޓިކަލްސް އިން އުފައްދާ މި ބޭހުގެ މުއްދަތު ހަމަވާ ތާރީހަކީ 2025 ވަނައަހަރުގެ ޖުލައި އެވެ.