ކުރީގެ ރައީސް، ރައީސް އަބްދުﷲ ޔާމިންގެ ސަރުކާރުން ހިންގި ހިޔާ މަޝްރޫއުގެ ދަށުން އެޅި 7000 ފުލެޓްގެ މަޝްރޫއަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ހޫނު ރައްދެެއް ދެއްވައިފިއެވެ.

އެމްޑީޕީގެ ޕީޖީ ގުރޫޕްގެ ވިޕް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ކުރެއްވި ޓުވީޓެއްގައި ހިޔާ މަޝްރޫއަށް އިޝާރަތް ކުރައްވަމުން ވިދާޅުވީ، ރައީސް ޔާމިންގެ ސަރުކާރުން ރައްޔިތުންނަށް ބޯހިޔާވަހި ކަން ދިނުމުގެ ނަމުގައި އެވަރުގެ ލަނޑެއް ރައްޔިތުންނަށް ދޭން ހެއު ނުވާނެ ކަމަށެވެ.

"ނިކަމެތި ރައްޔިތުންނަށް ބޯހިޔާވަހިކަން ފޯރުކޮށްދެނީޔޭ ކިޔާފައި މިވަރުގެ ލަނޑެއް ރައްޔިތުންނަށް ދޭން ހެއު ނުވާނެ އެއްނު، އަދިވެސް ބައެއް މޮޔައިން ރައީސް ޔާމިން އާއި ވެރިކަން ހަވާލުކޮށްގެން ކަންކަން ހައްލުކުރާ ވާހަކަ އެބަދައްކާ ސަހަރޯ!" ރޮޒައިނާ ވިދާޅުވިއެވެ.

ރޮޒައިނާ އެގޮތަށް ވިދާޅުވީ ހިޔާ މަޝްރޫއުގެ ދަށުން ހުޅުމާލޭގައި އިމާރަތްކުރި 7000 ފުލެޓް ޖާގައިގެ ދަތިކަމަށް އިޝާރަތް ކުރައްވައެވެ. ސަރުކާރުން ބުނަނީ އެއީ އިންސާނުން ދިރިއުޅެން ހެއުވާވަރުގެ ތަނެއް ނޫން ކަމަށެވެ. ރައީސް ސޯލިހް ވިދާޅުވެފައިވަނީ އެތަނަށް ވަންނަ 80 ޕަސެންޓް މީހުން އެތަނުގެ ޖާގައިގެ ދަތިކަމުންނާއި އުޅެންޖެހޭ ދަތި ހާލު ބޮޑުކަމުން އެތަނުން ނުކުންނާނެ ކަމަށެވެ.

މީގެ އިތުރުން ރޮޒައިނާ ކުރެއްވި ޓުވީޓްގައި ކަންކަން ހައްލު ކުރަން ރައީސް ޔާމިން ވެރިކަމަށް ގެންނަން ބަޔަކު ގޮވަމުންދާތީ އެކަމަށް ހަޖޫ ޖެއްސެވި ނަމަވެސް އިދިކޮޅު ފަރާތްތަކުން ވިދާޅުވަނީ ގައުމުގައި މިހާރު ހުރި މައްސަލަަތަކަށް ހައްލެއް ގެނެވޭނީ މިހާރު ޖަލުގައި ހުންނެވި ރައީސް ޔާމިން ވެރިކަމަށް ގެނެސްގެން ކަމަށެވެ.