ކޯވިޑް ރިކަވަރީ ލޯނުތައް އަނބުރާ ދެއްކުން 8 އަހަރާއި ހަމަހަށް ދަންމާލާފައިވާ ކަމަށް މާލީ ވުޒާރާއިން ހާމަކޮށްފިއެވެ.

ކޯވިޑް ރިކަވަރީ ލޯނު ސްކީމަކީ ކޯވިޑްގެ ސަބަބުން އިގުތިސާދަށް ކުރިމަތިވި ހީނަރުކަމުން އަރައިގަތުމަށް، ބީއެމްއެލް މެދުވެރިކޮށް ސަރުކާރުން ތައާރަފްކޮށްފައިވާ ލޯނު ސްކީމެކެވެ.

ދަޢުލަތުގެ މާލީ ވުޒާރާއިން މިއަދު ބުނީ، ކޯވިޑް-19 އާ ގުޅިގެން ސަރުކާރުން ތައާރަފުކުރި ރިކަވަރީ ލޯނު ސްކީމުން ލޯނު ނަގާފައިވާ ފަރާތްތަކުގެ ގްރޭސް ޕީރިއަޑް ޖުމުލަ 19 (ނަވާރަ) މަސްދުވަހުގެ މުއްދަތަކަށް، އިތުރުކޮށްދިނުމަށް ނިންމާފައިވާ ކަމަށެވެ. މިގޮތުން ގްރޭސް ޕީރިއަޑް އިތުރުކުރެވޭނީ ކުރިން މި މުއްދަތު އިތުރުކުރުމަށް ހުޅުވާލި ފުރުސަތުގައި ގްރޭސް ޕީރިއަޑް 19 (ނަވާރަ) މަހަށް އިތުރުކޮށްދެވިފައި ނުވާ ފަރާތްތަކަށް ކަމަށް މާލީ ވުޒާރާއިން ވަނީ ބުނެފައެވެ.

"މީގެ އިތުރުން ލޯނު އަނބުރާ ދެއްކުމުގެ މުއްދަތު، ގްރޭސް ޕީރިއަޑް ހިމެނޭގޮތަށް ޖުމުލަ 103 (އެއްސަތޭކަ ތިނެއް) މަސްދުވަހުގެ މުއްދަތަކަށް އިތުރުކުރުމުގެ ފުރުސަތު ލޯނު ނަގާފައިވާ ހުރިހާ ފަރާތަކަށްވެސް ހުޅުވާލެވިފައިވާނެއެވެ." މާލީ ވުޒާރާގެ އިޢުލާނުގައިވެއެވެ.

މާލީ ވުޒާރާއިން މިއަދު ބުނީ، ރިކަވަރީ ލޯނު އަނބުރާ ދެއްކުމުގައި ލުއި ފަސޭހަ ގޮތްތަކެއް ފަހިކޮށްދިނުމަކީ އެވުޒާރާގެ މަޤުސަދު ކަމަށެވެ. އަދި ލޯނުގެ ގޮތުގައި ދޫކުރާ ފައިސާ އަނބުރާ ހޯދުމަކީ މިފަދަ އިތުރު ސްކީމްތައް ހުޅުވާލުމަށް މަގު ފަހިވެގެންދާނެ ކަމެއް ކަމަށްވެސް މާލީ ވުޒާރާއިން ވަނީ ބުނެފައެވެ.

ކޮވިޑް-19 ރިކަވަރީ ސްކީމުން ލޯނު ނަގާފައިވާ ފަރާތްތަކުގެ ތެރެއިން ޖުމުލަ 19 މަހަށް ގްރޭސް ޕީރިއަޑް އިތުރުކުރުމަށް އެދިވަޑައިގަންނަވާ ފަރާތްތަކާއި، ލޯނު ރީޝެޑިއުލްކުރަން އެދިލައްވާ ފަރާތަކުން މިއަދުން ފެށިގެން 60 ދުވަހުގެ ތެރޭގައި އެކަން ބީއެމްއެލަށް އެންގެވުމަށް މާލީ ވުޒާރާއިން އެދިފައިވެއެވެ. އަދި މި މުއްދަތު ހަމަވާ ތާރީހުގައި ބީއެމްއެލަށް ފާހަގަވެފައިވާ ނަން-ޕަރފޯމިންގ ލޯނުތަކާމެދު (90 ދުވަހަށްވުރެ ގިނަ ދުވަހަށް ޕޭމަންޓް އޯވަރޑިއު ވެފައިވާ ފަރާތްތައް) ޤާނޫނީ ފިޔަވަޅު އެޅުމުގެ އިޚްތިޔާރު އެ ވުޒާރާއަށް އޮތްކަންވެސް މާލީ ވުޒާރާއިން ވަނީ ހަނދާންކޮށްދީފައެވެ.

ރިކަވަރީ ލޯނު ސްކީމްގެ ދަށުން ބީއެމްއެލްއިން 184 ވިޔަފާރިއަކަށް 637.8 މިލިއަން ރުފިޔާ ވަނީ ދޫކޮށްފައެވެ.