ޓްރާންސްޕޯޓް މިނިސްޓްރީގެ ޚިދުމަތްތައް ދެން ލިބޭނީ ހުޅުމާލޭގައި ހުންނަ އުމަރު ޒާހިރު އޮފީހުން ކަމަށް އެ ވުޒާރާއިން ހާމަކޮށްފިއެވެ.

ޓްރާންސްޕޯޓު މިނިސްޓްރީން ބުނީ މިއަދުން ފެށިގެން މިނިސްޓްރީ އޮފް ޓްރާންސްޕޯޓް ހިނގަމުންދާނީ ހުޅުމާލެ ފޭސް 1 ގައި ހުންނަ އުމަރު ޒާހިރު އޮފީސް އިމާރާތުގެ 3 ވަނަ ފަންގިފިލާގައި ކަމަށެވެ.

އަދި މިބަދަލާއެކު މިނިސްޓްރީގެ ކައުންޓަރުތަކުން ފޯރުކޮށްދޭ ހިދުމަތްތައް ދިނުމަށް ހަމަޖެހިފައިވަނީ އިމާރާތުގެ ގުރައުންޑް ފްލޯރގައި ގާއިމުކޮށްފައިވާ އެ މިނިސްޓްރީގެ ކައުންޓަރުތަކުން ކަމަށްވެސް މިނިސްޓްރީން ބުނެފައިވެއެވެ.

ޖުމްލަ 185 މިލިއަން ރުފިޔާ ހަރަދުކޮށްގެން ހުޅުމާލޭގައި ތަރައްޤީކުރި އުމަރު ޒާހިރު އޮފީސް އިމާރާތަށް ބަދަލުކުރި މިނިސްޓްރީތަކަކީ، ޓްރާންސްޕޯޓް މިނިސްޓްރީ، ހަޔާ އެޑިއުކޭޝަން މިނިސްޓްރީ އަދި ޖެންޑާ މިނިސްޓްރީއެވެ. އޭގެ އިތުރުން އަލަށް ރާއްޖޭގައި ގާއިމްކުރާ އެމެރިކާ އެމްބަސީ ހުޅުވަން ހަމަޖެހިފައިވަނީ ވެސް އެ އިމާރާތުގައެވެ.

ހައުސިން މިނިސްޓްރީން ބުނީ، ސަރުކާރުގެ އިދާރާތައް އެއްފުރާޅެއްގެ ދަށަށް ގެނެސް، ހިދުމަތް ހޯދުމުގައި ރައްޔިތުންނަށް ލުއިފަސޭހަ ގޮތްތައް ހޯދައިދިނުމަކީ ސަރުކާރުން އިސްކަމެއްދޭ ކަމެއްކަމަށެވެ.