މާލޭސިޓީ ކައުންސިލާ ދެކޮޅަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ހައިކޯޓަށް ހުށަހެޅި ދުސްތޫރީ މައްސަލަ ބަލައިގެންފި އެވެ.

ސްޓެލްކޯއިން ހައިކޯޓަށް ހުށަހަޅާފައިވަނީ މަގުކޮނުމާއި ޖަންކްޝަން ފަދަ ތަންތަނުގެ މަތި ނަގައިގެން ކުރާ މަސައްކަތާއި، މަގު ބަންދު ކޮށްގެން މަސައްކަތް ކުރުމަށް މާލޭސިޓީ ކައުންސިލުން 2 ޖަނަވަރީ 2023 ގައި ގެޒެޓްކުރި އުސޫލްތަކުގެ މައްސަލައެވެ.

ސްޓެލްކޯ އިން މިމަހު އަށްވަނަ ދުވަހު ހުށަހެޅި މިމައްސަލަ ބަލައިގެންފައި މިވަނީ ދެވަނަ ފަހަރަށް ހުށަހެޅުމުންނެވެ. ސްޓެލްކޯ އިން ކޯޓުގައި އެދިފައިވަނީ މާލެ ސިޓީގެ މަގުމަތީގައި މަގުބަންދު ނުކޮށް އަދި މަގުބަންދު ކޮށްގެން މަސައްކަތްކުރުމާ ބެހޭ އުސޫލާއި، މަގު ކޮނުމާއި ޖަންކްޝަން ފަދަ ތަންތަނުގެ މަތި ނަގައިގެން އާންމުކޮށް މަސައްކަތް ކުރުމުގެ އުސޫލު ބާތިލުކުރުމަށެވެ.

ސްޓެލްކޯއިން ހުށަހެޅި މައްސަލައިގައި ބުނެފައިވަނީ، ސިޓީ ކައުންސިލްގެ ދެ އުސޫލަކީ މާލޭގައި ދިރިއުޅޭ ރައްޔިތުންނަށް ޖެއްސުންކޮށް ލިބޭ ހިދުމަތްތަކުގެ އަގު ބޮޑުކުރުމުގެ ނިޔަތުގައި ގާނޫނާއި ހިލާފަށް އަމަލުކުރަން ފެށި ދެ އުސޫލެއް ކަމަށެވެ. އެގޮތުން ބައެއް އަގުތައް 154 އިންސައްތަ މަތިކޮށްފައިވާ ކަމަށް ސްޓެލްކޯއިން ވަނީ ބުނެފައެވެ.

މި މައްސަލާގައި މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ސްޓެލްކޯގެ މެނޭޖިން ޑިރެކްޓަރު އަޙްމަދު ޝަރީފް ވިދާޅުވީ، ކުރިން 60 ރުފިޔާ ނެގި ބައެއް ހިދުމަތްތަކުން 200 ރުފިޔާ ނަގަން ގެޒެޓުކޮށްފައިވާ ކަމަށެވެ. އަދި ރޯޑްބްލޮކްވާ ގޮތަށް ބަހައްޓާ ބޯޑުން ކުރިން ނަގަމުން ގެންދިޔަ 150ރުފިޔާ 300 ރުފިޔާއަށް ބޮޑުކޮށްލުމަކީ ރައްޔިތުންނަށް އޭގެ ސަބަބުން ބޮޑެތި ދަތިތަކާ ކުރިމަތިވާނެ ކަމެއްކަމަށްވެސް ޝަރީފް ވިދާޅުވިއެވެ.