ހުޅުމާލެ އަށް ދިމާވެފައިވާ މައްސަލަތަކުގެ ހައްލަކީ ހައުސިން ޑިވޮލްޕަމަންޓް ކޯޕަރޭޝަން، އެޗްޑީސީ އުވާލުން ނޫން ކަމަށް ވިލިނގިލީ ދާއިރާގެ މެމްބަރު ސައުދު ހުސައިން ވިދާޅުވެއްޖެއެވެ.

އެޗްޑީސީއިން އުޅެނީ ހުޅުމާލެ އަކީ އެ ކުންފުނީގެ ތަރިކަ މުދަލަކަށް ހަދައިގެން ކަމަށާއި އެއީ އެކުންފުންޏަށް ކުރެވޭނެ ކަމަކަށް ނުވާތީ އެ ކުންފުނި އުވާލުމަށް ރައްޔިތުން މަޖިލީހުގެ މާފަންނު މެދު ދާއިރާގެ މެންބަރު މުހައްމަދު ރަޝީދު (ބޮންޑޭ) ވަނީ ގޮވާލައްވާފައެވެ. އެކަމަށް އިޝާރަތް ކުރައްވައި ކުރެއްވި ޓުވީޓެއްގައި ވިލިނިގިލީ ދާއިރާގެ އަމިއްލަ މެމްބަރު ސައުދު ހުސައިން ވިދާޅުވީ ހައްލަކީ އެޗްޑީސީ އުވާލުން ނޫން ކަމަށާއި، ހައްލަކީ ހުޅުމާލެ އަށް ވަކި ސިޓީ އެެއް އުފެއްދުން ކަމަށެވެ. ކުރިއަށް އޮތްތާގައި ހުޅުމާލެ އެންމެ ބޮޑު އާބަދީ އެެއް އޮންނަ ރަށައް ވެގެންދާނެ ކަމަށް ސައުދު ވިދާޅުވިއެވެ.

"ހުޅުމާލެ އަކީ ދިވެހި ރާއްޖޭގެ ހުރިހާ ރައްޔިތުންހެން ދިރިއުޅެން ފަށާފައިވާ އަދި ބޮޑު އާބާދީ އެއް ކުރިއަށް އޮތްތާގައި ވަޒަންވެރިވާނެ އެންމެ ބޮޑު އާބާދީ އެކުލެވޭ ރަށަކަށް ވެގެންދާނެ. އެޗްޑީސީ އުވާލުމަކީ ހައްލެއް ނޫން." ސައުދު ވިދާޅުވިއެވެ.

Hulhumale akee Dhivehi raajjeyge hurihaa rashakun hen rayyithun dhiriulhen fashāfaivā adhi bodu aabaadhee eh kuriyah oithaaga vazan verivāne enme bodu aabaadhee ekulevey rashah vegen dhaane, HDC uvaalumakee halleh nun, hallakee Hulhumale ah vaki City eh ufedhun. #HulhumaleCity pic.twitter.com/O68zKwrArQ

— Saud Hussain MP (@SaudVillingili) June 27, 2020

އެސްއޯއީ ކޮމެޓީގެ ބައްދަލުވުމުގައި ހުޅުމާލެ ދެވަނަ ފިޔަވަހިން ބިން ވިއްކަން އެޗްޑީސީ ނިންމާފައިވާ ކަމަށް ބުނެ އެކަން ބެލުމަށް އެދި ހުށަހަޅާފައިވާ މައްސަލައާ ގުޅޭ ގޮތުން ވާހަކަ ދައްކަވަމުން ބޮންޑޭ ވިދާޅުވީ އެޗްޑީސީ އުވާލުމަށްފަހު ލާމަރުކަޒީ ގާނޫނުގެ ދަށުން ރަށްރަށުގެ ބިން ބޭނުން ކުރުމުގައި އަމަލު ކުރާ އުސޫލުގެ ތެރެއަށް ފެއްތުމަށްފަހު އާ ކުންފުންޏެއް އުފައްދަން ޖެހޭ ކަމަށެވެ.

"އެހެންވީމަ ތަރިކަ މުދަލެއްގެ ގޮތުގައި އެޗްޑީސީން ދެކިގެން ނުވާނެ. އެއީ ރައްޔިތުންގެ ކުންފުންޏެއް. ބިމަކީ ރައްޔިތުންގެ ބިން. އެހެންވީމަ އެޗްޑީސީ އެބަޖެހޭ އުވާލަން މިހާރު." ބޮންޑޭ ވިދާޅުވިއެވެ.