އައްޑޫ އިކުއެޓޯރިއަލް ހޮސްޕިޓަލަށް 29 ދިވެހި ޑޮކްޓަރުން ހޯދުމަށް އިޢުލާނު ކޮށްފިއެވެ.

އައްޑޫ އިކުއެޓޯރިއަލް ހޮސްޕިޓަލުން ކޮށްފައިވާ އިއުލާނެއްގައި ބުނެފައިވަނީ، އެ ހޮސްޕިޓަލަށް ދިވެހި ޑޮކްޓަރުން ބޭނުންވާ ކަމަށެވެ. އެގޮތުން 15 ދާއިރާއާކުން 29 ޑޮކްޓަރުން ބޭނުންވާ ކަމަށް އިޢުލާނުގައިވެއެވެ. އައްޑޫ އިކުއެޓޯރިއަލް ހޮސްޕިޓަލުން މިހަފްތާގައިވަނީ ކޮމިއުނިޓީ ހެލްތު އޮފިސަރުންނާއި އޮކިއުޕޭޝަނަލް ތެރަޕިސްޓުންނާއި އެހެނިހެން އިދާރީ ވަޒީފާތަކަށްވެސް މީހުން ހޯދުމަށް އިޢުލާނު ކޮށްފައެވެ.

އައްޑޫ ހޮސްޕިޓަލުން ހޯދުމަށް އިޢުލާނުކޮށްފައިވަނީ، އެތެރެހަށީގެ ތިން ޑޮކްޓަރުންނާއި، ހޭނައްތާ ތިން ޑޮކްޓަރުންނާއި، އޮޕަރޭޝަން ޑޮކްޓަރަކާއި، ކަށީގެ ތިން ޑޮކްޓަރުންނާއި، ކުޑަކުދިންގެ ތިން ޑޮކްޓަރުންނާއި، އަންހެނުންގެ ތިން ޑޮކްޓަރުންނާއި، ދެ ސައިކޭޓްރިސްޓުންނާއި، ތިން ރޭޑިއޮލޮޖިސްޓުންނާއި، ހަމުގެ ދެ ޑޮކްޓަރުންނާއި، ކަރުންމަތީގެ ދެ ޑޮކްޓަރުންނެވެ.

އޭގެއިތުރުން ލޮލުގެ ޑޮކްޓަރަކާއި، ޔޫރޮލޮޖިސްޓަކާއި، ޕެތޮލޮޖިސްޓަކާއި، ދަތުގެ ހާއްސަ ޑޮކްޓަރަކާއި، އިމަޖެންސީ ފިޒީޝަނެއް ހޯދުމަށްވެސް އިޢުލާނުކޮށްފައިވެއެވެ.

މި މަގާމުތަކަށް ކުރިމަތިލާ ފަރާތްތަކުގެ މުސާރައެއްގޮތުގައި ކަނޑައަޅާފައިވަނީ 25،260 ރުފިޔާ އާއި 54،430 ރުފިޔާ އާ ދެމެދުގެ ޢަދަދެކެވެ.

އައްޑޫ ހޮސްޕިޓަލުން ބުނީ، އެމަގާމުތަކަށް ޝައުގުވެރިވާ ފަރާތްތަކުން މި މަހުގެ ހައެއްގެ ކުރިން ލިޔެކިޔުންތައް ހުށަހަޅަން ފުރުސަތު ހުޅުވާލާފައިވާކަމަށެވެ.