'އަންއެމްޕްލޯއިމަންޓް އިންޝުއަރެންސް ބެނެފިޓް' ތައާރަފްކުރުމަށް ސަރުކާރުން މަސައްކަތް ކުރަމުންދާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ވަޒީފާ ގެއްލޭ މީހުންނަށް އިޖްތިމާއީ ރައްކާތެރިކަން ކަށަވަރުކޮށްދިނުމަކީ އެމްޑީޕީގެ ޖަޒީރާ ރާއްޖެ މެނިފެސްޓޯގައި ހިމެނޭ މުހިންމު ވަޢުދެކެވެ. އެސިޔާސަތު ތަންފީޒުކުރުމަށް ސަރުކާރުން މަސައްކަތް ކުރަމުންދާ ކަމަށް ރައީސް ވިދާޅުވެފައިވާއިރު މި ވެރިކަމުގެ ދައުރު ހަމަވުމަށް ބާކީ އޮތީ 9 މަސް ދުވަހެވެ.

މޯލްޑިވްސް ޓްރޭޑް ޔޫނިއަން ކޮންގްރެސްގެ މަސައްކަތްތެރިންގެ ކޮންގްރެސް ހުޅުވުމަށް ބޭއްވި ރަސްމިއްޔާތުގައި ރައީސް ވިދާޅުވީ މަސައްކަތްތެރިންގެ އިޖްތިމާއީ ރައްކާތެރިކަން ކަށަވަރުކުރުމަކީ ސަރުކާރުގެ ވައުދެއް ކަމަށެވެ. އެ ގޮތުން ރާއްޖޭގެ މަސައްކަތްތެރިންނާއި މަސައްކަތްތެރިންގެ އާއިލާތަކުގެ ދިރިއުޅުމުގެ ހާލަތު ރަނގަޅުކޮށް، އާމްދަނީ އިތުރުކޮށްދިނުމަށް ސަރުކާރުން މަސައްކަތް ކުރަމުން ދާކަމަށެވެ.

ރައީސް ވިދާޅުވީ އަންއެމްޕްލޯއިމަންޓް އިންޝުއަރެންސް ބެނެފިޓް ތައާރުފް ކުރުމަށް ގާނޫނީ އޮނިގަނޑަށް ގެންނަންޖެހޭ ބަދަލުތަކާ ބެހޭ ގޮތުން، ބޭރުގެ ފަންނީ ބޭފުޅުންގެ އެހީއާއެކު ކަމާ ބެހޭ ގާނޫނެއްގެ ދެލިކޮޕީ އެކުލަވައިލުމުގެ މަސައްކަތް މިހާރު ކުރަމުންދާކަމަށެވެ. އަދި މާ ލަސްތަކެއްނުވެ އެ ބިލު ރައްޔިތުންގެ މަޖިލީހަށް ފޮނުވިގެންދާނެ ކަމުގެ ޔަގީންކަން ރައީސް ވަނީ ދެއްވާފައެވެ.

ރައީސްގެ ވާހަކަފުޅުގައި ވަނީ މި ސަރުކާރުން މިނިމަމްވޭޖް ތައާރަފްކޮށް، ސާވިސް ޗާޖްގެ ފައިދާ މުވައްޒަފުންނަށް ހަމަހަމައަށް ލިބިދިނުމަށް ގާނޫނަށް ބަދަލު ގެނެސްފައިވާކަން ފާހަގަ ކުރަށްވާފައެވެ. އަދި މަސައްކަތްތެރިންނަށް ވަޒީފާގެ ފުރުސަތު ފަހިކޮށްދިނުމަށް ޖޮބް ސެންޓަރުގެ ޑެކްސްތައް ގާއިމުކޮށް ހިދުމަތްދެމުން އަންނަކަމަށް ރައީސް ވިދާޅުވެފައިވެއެވެ.