ދަޢުލަތުގެ ރަސްމީ ރިޒާވް އިތުރުވެ 795 މިލިއަން ޑޮލަރަށް އަރާފައިވާކަމަށް ތަފާސް ހިސާބުތަކުން ދައްކައިފިއެވެ.

އެމްއެމްއޭގެ ތަފާސް ހިސާބުތައް ދައްކާގޮތުން މިދިޔަ ފެބްރުއަރީ މަސް ނިމުނުއިރު ދަޢުލަތުގެ ރިޒާވްގައި ހުރީ 795 މިލިއަން އެމެރިކާ ޑޮލަރެވެ. ޖެނުއަރީ މަސް ނިމުނުއިރު ރިޒާވްގައި ހުރީ 789.97 މިލިއަން އެމެރިކާ ޑޮލަރެވެ. ނަމަވެސް 2022 ވަނަ އަހަރު ނިމުނުއިރު ދައުލަތުގެ ރަސްމީ ރިޒާވްގައި 827 މިލިއަން އެމެރިކާ ޑޮލަރު ހުރި ކަމަށް ތަފާސް ހިސާބުން ދައްކައެވެ.

ކުރު މުއްދަތުގައި ދައްކަންޖެހޭ ދަޢުލަތުގެ ދަރަނި، ފެބްރުއަރީ މަސް ނިމުނުއިރު ހުރީ 560.35 މިލިއަން އެމެރިކާ ޑޮލަރުގަ އެވެ. އެހެންކަމުން ފެބްރުއަރީ މަސް ނިމުނުއިރު ޔޫސަބަލް ރިޒާވްގައި ހުރީ 235.48 މިލިއަން އެމެރިކާ ޑޮލަރެވެ. ޔޫޒަބަލް ރިޒާވަކީ ރަސްމީ ރިޒާވުން ކުރު މުއްދަތުގައި އަދާކުރަންހުރި ބޭރު ފައިސާގެ ލަޔަބިލިޓީތައް އުނިކުރުމުން ބާކީ އޮންނަ ޢަދަދެވެ.

ރާއްޖޭގެ ޔޫޒަބަލް ރިޒަރވް އެންމެ ދަށަށް ވެއްޓިފައިވަނީ ކުރީ ދައުރުގެ ތެރޭގައެވެ. މިގޮތުން މޭ 2017 ގެ ތެރޭގައި ޔޫޒަބަލް ރިޒަރވް 52 މިލިއަން އެމެރިކާ ޑޮލަރަށް ވެއްޓިގެން ދިޔައެވެ.

މަރުކަޒީ ބޭންކުން އާންމުކޮށްފައިވާ ހިސާބުތަކުން ދައްކާގޮތުގައި ރާއްޖޭގެ ރަސްމީ ރިޒަރވް އެންމެ މަތީގައި ހިފެހެއްޓިފައިވަނީ ފާއިތުވެދިޔަ 4 އަހަރުގެ ތެރޭގައެވެ. މިގޮތުން 2018 ޑިސެންބަރުން 2022 ޑިސެންބަރުގެ އެވްރެޖް ގޮތެއްގައި ރަސްމީ ރިޒާވްގައި 817 މިލިއަން އެމެރިކާ ޑޮލަރު ހުރިކަމަށް ހިސާބުތަކުން ދައްކާއިރު، މިއީ ކުރީ ދައުރުގެ އެވްރެޖް ރިޒާވް ހުރި މިންވަރާ އަޅާބަލާއިރު 39 އިންސައްތަ ގެ އިތުރުވުމެއްކަމަށް ތަފާސް ހިސާބުތަކުން ދައްކައެވެ.

އެމްއެމްއޭގެ ތަފާސް ހިސާބުތަކުން ދައްކާގޮތުގައި ރާއްޖޭގެ ރިޒާވް ފުރަތަމަ ފަހަރަށް 1 ބިލިއަން އެމެރިކާ ޑޮލަރަށް، 2021 ސެޕްޓެންބަރުގެ ތެރޭގައި ވަނީ އަރާފައެވެ. މިސަރުކާރުގައި ރިޒާވް އެންމެ ދަށަށް ދިޔައިރުވެސް ރިޒާވްގައި 499.63 މިލިއަން އެމެރިކާ ޑޮލަރު ހުއްޓެވެ. އަދި ކުރީ ސަރުކާރުގައި ރިޒާވް އެންމެ ދަށަށް ވެއްޓިގެން ދިޔައިރު ރިޒާވްގައި ހުރީ 343.5 މިލިއަން އެމެރިކާ ޑޮލަރުކަމަށް ހިސާބުތަކުން ދައްކައެވެ.

ފިނޭންސް މިނިސްޓްރީން އަންދާޒާކުރަނީ މިއަހަރު ނިމޭއިރު ރަސްމީ ރިޒާވްގައި 606.3 މިލިއަން އެމެރިކާ ޑޮލަރު ހުންނާނެ ކަމަށެވެ.