ކޮންޓްރޯލް ޑެލިވަރީ އޮޕަރޭޝަނެއްގައި ޑްރަގާއި ހަވާލުވާން އައުމުން ހައްޔަރުކުރި މީހަކު ކްރިމިނަލް ކޯޓުން ދޫކޮށްލައިފިއެވެ.

ކްރިމިނަލް ކޯޓުން ދޫކޮށްލާފައިވަނީ 2022ވަނަ އަހަރުގެ ޑިސެމްބަރު މަހުގެ ތެރޭގައި ސްވިޒަލޭންޑަށް ނިސްބަތްވާ ފިރިހެނަކު ވައިގެ މަގުން ރާއްޖެއަށް އެތެރެކުރި 2 ކިލޯއަށްވުރެ ގިނަ ކޮކެއިން އާއި ހަވާލުވާންދިޔަ ދެމީހުންގެ ތެރެއިން އެކަކެވެ. މި މަސްތުވާތަކެތީގެ މަގުމަތީއަގު 7.7 މިލިއަން ރުފިޔާއަށް އަރާ ކަމަށް ކަސްޓަމްސުން މީގެ ކުރިން ވަނީ ބުނެފައެވެ.

މަސްތުވާތަކެތި ރާއްޖެއަށް އެތެރެކުރި ބިދޭސީ މީހާގެ އެއްބާރުލުމާއެކު ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަނުގައި އެތަކެއްޗާއި ހަވާލުވާންއައި ދެމީހަކު ވަނީ ހައްޔަރުކޮށްފައެވެ. ނަމަވެސް ބަންދުގެ މުރާޖަޢާ އަޑުއެހުމުގައި، އެތަނުން އެކަކުގެ މައްޗަށް ހެކި ހުރިނަމަވެސް ބަންދުގައި ބަހައްޓަން ނުފެންނަ ކަމަށް ނިންމާ ކްރިމިނަލް ކޯޓުން ވަނީ އޭނާ ދޫކޮށްލާފައެވެ.

ކްރިމިނަލް ކޯޓުން ބުނެފައިވަނީ، އޭނާގެ މައްޗަށް ދައުވާކުރެވޭވަރަށް ހެކި ހުރިނަމަވެސް މަސްތުވާތަކެތި ގެނައި މީހާއާއި އެއްވެސް މުއާމަލާތެއް އޭނާ ކޮށްފައިނުވާކަމަށެވެ. އެހެންކަމުން މައްސަލަ ނިމެންދެން އޭނާ ބަންދުގައި ބަހައްޓަން ނުފެންނަކަމަށްބުނެ ކޯޓުން ވަނީ އެމީހާ ދޫކޮށްލާފައެވެ.

ދަޢުލަތުން މިހާރުވަނީ މި މައްސަލަ ހައިކޯޓުގައި އިސްތިއުނާފުކޮށްފައެވެ.