އަންނަ މަހުން ފެށިގެން ވެމްކޯގެ ކުނި މެނޭޖްކުރުމުގެ ޚިދުމަތްތަކަށް ކަނޑައަޅާފައިވާ ފީ ސްޓެލްކޯގެ ބިލުގައި ހިމަނަން އެންވަޔަރަމެންޓް މިނިސްޓްރީން ނިންމައިފި އެވެ.

އެންވަޔަރްމަންޓް މިނިސްޓްރީން މިއަދު ބުނީ މާލޭގައި ކުނި މެނޭޖްކުރުމުގެ ޚިދުމަތް ފޯރުކޮށްދިނުމުގައި ހަރަކާތްތެރިވާ ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އަށް މިވަގުތު ދިމާވެފައިވާ އެންމެ ބޮޑު އެއް ގޮންޖެހުމަކީ ޚިދުމަތްތަކަށް ކަނޑައަޅާފައިވާ ފީ ބައެއް ފަރާތްތަކުން ގަވާއިދުން ނުދައްކާ މައްސަލަ ކަމަށެވެ.

އެމައްސަލައަށް އަވަސް ހައްލެއް ހޯދުމުގެ ގޮތުން އަންނަ މަހުގެ އެއްވަނަ ދުވަހުން ފެށިގެން ވެމްކޯއިން މާލެ ސަރަހައްދުގައި ދެމުންދާ ޚިދުމަތްތަކަށް ކަނޑައަޅާފައިވާ ފީ ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ ބިލުގައި ހިމަނައިގެން ނެގުމަށް މިނިސްޓްރީން ވެމްކޯއާއެކު ކުރި މަޝްވަރާތަކަށްފަހު ނިންމާފައިވާ ކަމަށް މިނިސްޓްރީން ވަނީ ބުނެފައެވެ. މި ބަދަލާ ގުޅިގެން ސީދާ ވެމްކޯއިން މާލޭގައި ޚިދުމަތް ދެމުންގެންދާ ތަންތަނުން މިހާރުވެސް ނަގާފީއަށް އެއްވެސް ބަދަލެއް ނާންނާނެ ކަމަށް މިނިސްޓްރީން މަޢުލޫމާތުދެއެވެ.

މިނިސްޓްރީން ބުނީ ކުނި މެނޭޖްކުރުމުގެ މަސައްކަތް ދާއިމީ ގޮތެއްގައި ކުރިއަށް ގެންދެވޭނީ ޚިދުމަތް ހޯދާ ހުރިހާ ފަރާތަކުންވެސް ވެމްކޯއަށް ފީ ދައްކައިގެން ކަމަށެވެ. އެހެންކަމުން އެންމެ ފަސޭހައިން، ޚަރަދުކުޑަކޮށް މި ފީ ލިބިގަނެވޭނެ ގޮތަކީ ޢާންމު ބޭނުންތަކުގެ އެހެން ޚިދުމަތެއްގެ ބިލުގައި މި ފައިސާވެސް ހިމަނައިގެން ފީ ކަލެކްޓްކުރުން ކަމަށް މިނިސްޓްރީން ހާމަކޮށްފައިވެއެވެ.

މާލެ ސަރަޙައްދުގައި ވެމްކޯއަށް ފީދައްކަންޖެހޭ 53،690 ގޭބިސީ ހުރިނަމަވެސް ވެމްކޯގެ ޚިދުމަތަށް ރަޖިސްޓްރީކޮށްގެން ބަރާބަރަށް ފީ ދައްކަމުން އަންނަނީ ގާތްގަނޑަކަށް 20،000 ގޭބިސީން ކަމަށް މިނިސްޓްރީން ވަނީ ބުނެފައެވެ.