ދައުލަތުގެ އޮފީސްތަކަށް ކްރެޑިޓް ކާޑު ބޭނުންކުރެވޭނެ ގޮތުގެ އުސޫލެއް ދަޢުލަތުގެ މާލީ ވުޒާރާއިން އާންމުކޮށްފި އެވެ.

މިއަދު ގެޒެޓުކޮށްފައިވާ އެ އުސޫލުގައި ބުނެފައިވަނީ އެކަމަށް އެދޭ އޮފީސްތަކުން ކްރެޑިޓް ކާޑަށް އެދި ހާއްސަ ފޯމެއް ފިނޭންސް މިނިސްޓްރީއަށް ހުށަހަޅަންޖެހޭނެ ކަމަށެވެ. އެގޮތުން އެ ފޯމުގައި ކާޑު ބޭނުންކުރާ މަގުސަދާއި، ބޭނުންވާ ކްރެޑިޓް ލިމިޓް އަދި ބޭނުންކުރާނެ ފަރާތްތަކުގެ ތަފުސީލުތައް ހިމަނަންޖެހެއެވެ.

ކައުންސިލްތަކުން ކްރެޑިޓް ކާޑަށް އެދި ލޯކަލް ގަވަމަންޓު އޮތޯރިޓީ (އެލްޖީއޭ) މެދުވެރިކޮށް ހުށައަޅަން ޖެހޭއިރު ކްރެޑިޓް ކާޑަށް ހުއްދަދީ، ފައިނޭންޝަލް އިންސްޓިއުޓަށް އެކަމަށް އެދި ހުށަހަޅާނީ ފިނޭންސް މިނިސްޓަރުގެ ހުއްދައާއެކު ފައިނޭންޝަލް ކޮންޓްރޯލާ އެވެ.

މިގޮތަށް ކްރެޑިޓް ކާޑު ދޫކުރުމުގެ މަޤްސަދަކީ އޮފީސްތަކުން ކުރަންޖެހޭ ފައިސާގެ މުއާމަލާތްތައް ކުރުމުގައި އިންޓަނެޓު ބޭންކިން މެދުވެރިކޮށް ނޫން ގޮތަކަށް ހިންގެން ނުހުންނަ މުޢާމަލާތްތައް ފަސޭހަކަމާއެކު ކުރެވޭ މަގު ތަނަވަސްކޮށްދިނުމެވެ.

އުސޫލުގައިވާ ގޮތުން އޮފީސްތަކަށް ދޫކުރާ ކާޑުތަކުގެ ކްރެޑިޓް ލިމިޓު ކަނޑައެޅުމުގެ ބާރު ފިނޭންސް މިނިސްޓްރީއަށް ލިބިގެންވެ އެވެ. އަދި އެ ލިމިޓަށްވުރެ އިތުރަށް ހަރަދުކުރާނަމަ މިނިސްޓްރީން ލިޔުމުން ހުއްދަ ހޯދަން ޖެހެއެވެ.

ހަމައެއާއެކު ގަވާއިދާ ހިލާފަށް ކާޑު ބޭނުންކުރާނަމަ އެ ކާޑުގެ ނޮމިނީ ބަދަލުކުރުމާއި ނުވަތަ ކާޑު އަތުލައި، ކެންސަލް ކުރުމުގެ ބާރު ފައިނޭންޝަލް ކޮންޓްރޯލާއަށް މި އުސޫލުން ވަނީ ދީފައެވެ.