މާދަމާއިން ފެށިގެން މާލެ ސަރަހައްދުގެ މިސްކިތްތަކުގައި ޖަމާއަތުގައި ނަމާދު ކުރެވޭނެ ކަމަށް ރައީސް އިބްރާހިމް މުހަންމަދު ޞާލިޙް ވިދާޅުވެެއްޖެއެވެ.

ރައީސް އިބްރާހިމް މުހައްމަދު ޞާލިހް މިއަދު ކުރެއްވި ޓުވީޓެއްގައި ވިދާޅުވީ އާ އާންމު ހާލަތުގައި ދޭން ފަށާފައިވާ ލުއިތަކުގެ ދަށުން ޖުލައި އެކަކުން ފެށިގެން މިސްކިތްތަކުގައި ޖަމާއަތުގައި ނަމާދު ކުރެވޭނެ ކަމަށެވެ. ރައީސް ކުރެއްވި ޓުވީޓްގައި ކޮވިޑާއި ގުޅިގެން ފްރޮންޓްލައިންގައި މަސައްކަތް ކުރައްވާ ސިއްހީ އެހީތެރިންނާއި ސިފައިންނާއި ފުލުހުން ވަމުންދާ ގުރުބާނީ ފާހަގަކުރައްވައި އެމަނިކުފާނު ވަނީ ހުރިހާ ފަރާތްތަކަށް ޝުކުރު އަދާކުރައްވާފައެވެ.

ކޯވިޑް-19 އާ ގުޅިގެން މާލެ ސިޓީގެ މިސްކިތްތަކުގައި ޖަމާއަތުގައި ނަމާދު ކުރުން މަނާ ކުރީ މާޗް 18 އިން ފެށިގެންނެވެ. މި މަހުގެ 14 ވަނަ ދުވަހު ވަނީ މިސްކިތްތަކަށް ގޮސް ވަކިން ނަމާދު ކުރުމުގެ ހުއްދަ ދީފައެވެ. މާދަމާއިން ފެށިގެން މިސްކިތުގައި ޖަމާއަތުގައި ނަމާދުކުރުމުގެ ހުއްދަ ދީފައިވާއިރު، އާ އާންމު ހާލަތުގެ އުސޫލުތަކާ އެއްގޮތަށް އޮފީސްތަކާއި ވިޔަފާރިތައް ހުޅުވުމުގެ ހުއްދަވެސް ސަރުކާރުން މިހާރު ވަނީ ދޭން ނިންމާފައެވެ.