ކޮވިޑް-19 ޖެހިގެން ރާއްޖެ އިން ނުވަވަނަ މީހާ މިއަދު މަރުވެއްޖެ އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ މިއަދު މަރުވީ ޑީއެޗް11 ގައި ފަރުވާދެމުން ދިޔަ 43 އަހަރުގެ ފިލިޕީންސް މީހެއް ކަމަށެވެ.

ކޮވިޑް-19 ގައި ރާއްޖެ އިން މިހާތަނަށް މަރުވެފައި ވަނީ ތިން ދިވެހިންނާއި ބަންގްލަދޭޝްގެ ފަސް މީހުންނެވެ. އެންމެ ފަހުން މަރުވެފައި ވަނީ ޖޫން 6 ވަނަ ދުވަހު، އައިޖީއެމްއެޗްގައި ފަރުވާ ދެމުން ދިޔަ ބަންގްލަދޭޝްގެ ރައްޔިތެކެވެ.

ޓްރީ ޓޮޕް ހޮސްޕިޓަލުގައި ކޮވިޑް-19 އަށް ފަރުވާ ދެމުން ދިޔަ ހާލު ބޮޑު ތިން މީހަކު އިއްޔެ ވަނީ ދަރުމަވަންތަ ހޮސްޕިޓަލަށް ބަދަލުކޮށްފަ އެވެ. އޭގެ ތެރޭން ދެ މީހަކު އޮތީ ވެންޓިލޭޓަރުގައި ކަމަށް އެޗްޕީއޭ އިން ބުނެެއެވެ.