ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަށް ކުރިމަތިލާފައިވާ ކެނޑިޑޭޓުންގެ ތެރެއިން ފަސް ކެނޑިޑޭޓަކު ނަން އަނބުރާ ނަގާފައިވާ ކަމަށް އިލެކްޝަން ކޮމިޝަން (އީސީ) އިން މިއަދު ބުނެފިއެވެ.

އިލެކްޝަން ކޮމިޝަނުން ވަނީ ނަން އަނބުރާ ނެގި ކެނޑިޑޭޓުންގެ މައުލޫމާތު ގެޒެޓްކޮށްފައެވެ. އޭގެ ތެރޭގައި ހިމެނެނީ، ސަރުކާރު ހިންގާ މައި ޕާޓީ އެމްޑީޕީން ކުރިމަތިލި ދެ ކެނޑިޑޭޓުންނާއި އިދިކޮޅު ޕީޕިއެމުން ކުރިމަތިލި އެއް ކެނޑިޑޭޓެއްގެ އިތުރުން އަމިއްލަ ގޮތުން ވާދަކުރި ދެ ކެނޑިޑޭޓުން ކަމަށް އެ ކޮމިޝަނުން ހާމަކުރެއެވެ.

ނަން އަނބުރާ ގެންގޮސްފައިވަނީ އަމިއްލަގޮތުން ކުރިމަތިލި ކެންޑިޑޭޓް، އަބްދުލް މަޖީދު މާހިރު، އެންދެރިމާގެ / ލ.މާވަށް، އަމިއްލަގޮތުން ކުރިމަތިލި ކެންޑިޑޭޓް، ފާތިމަތު ސާއިގާ ޚާލިދު، ދޯދި / ގއ. ކޮނޑޭ، އެމްޑީޕީގެ ކެނޑިޑޭޓް، ހަސަން ނާފިއު، ދެތަޑިމާގެ / އއ. ބޮޑުފޮޅުދޫ، އެމްޑީޕީގެ ކެނޑޑޭޓް ،މުހައްމަދު ރަޝީދު، ރިސާދު/ ނ. މާޅެންދޫ، އަދި ޕީޕީއެމްގެ ކެންޑިޑޭޓް، ނަސްފާ މުހައްމަދު ސަޢީދު، ދުންފިނިގެ/ ށ. މަރޮށި ކަމަށް އިލެކްޝަންސް ކޮމިޝަނުން ބުނެއެވެ.

އިންތިހާބުގެ ހާއްސަ ގާނޫނު ގެ 3 ވަނަ މާއްދާގެ (ށ) ދަށުން، ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ އިންތިހާބަށް ކުރިމަތިލާފައިވާ ކެންޑިޑޭޓުންގެ ނަން އަނބުރާ ގެންދިއުމުގެ ފުރުސަތު، ހުޅުވާލާފައިވަނީ މިހިނގާ ޖޫން މަހުގެ 23 ވަނަ ދުވަހުއެވެ. މި އަަހަރުގެ އޭޕްރީލް މަހު ބާއްވަން ނިންމާފައި އޮތް ލޯކަލް ކައުންސިލްގެ އިންތިހާބާއި އަންހެނުންގެ ތަރައްގީ އަށް މަސައްކުރާ ކޮމިޓީގެ އިންތިހާބު ފަސްކޮށްފައިވަނީ ކޮވިޑް-19އާ ގުޅިގެންނެވެ. އެއާއި އެކު އިންތިހާބު ބޭއްވެންދެން މިހާރު އޮތް ކައުންސިލްތަކުގެ ދައުރު ދެމިގެންދާ ގޮތަށް ގާނޫނުއަސާސީ އަށް އިސްލާހުގެނެސް މިހާރުގެ ކައުންސިލް ތަކުގެ ދައުރު ވަނީ ދިގުދަންމާލާފައެވެ.