ދަޢުލަތުގެ ހުރިހާ މުވައްޒަފުންނަށް ރަމަޟާން އެލަވަންސް ދީފައިވާކަމަށް މާލީ ވަޒީރު އިބްރާހިމް އަމީރު މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރ އަމީރު ވިދާޅުވީ، ދަޢުލަތުގެ މާލީ ވުޒާރާއިން މުސާރަދޭ ހުރިހާ މުވައްޒަފުންނަށްވެސް ރަމަޟާން މަހުގެ އެލަވަންސް ދީފައިވާ ކަމަށެވެ.

މާލީ ވުޒާރާއިން މީގެ ކުރިން ނެރުނު މާލިއްޔަތާބެހޭ ސަރކިއުލާގައި ބުނެފައިވަނީ މިއަހަރުގެ ރަމަޟާންމަހުގެ އިނާޔަތުގެ ފައިސާ މުވައްޒަފުންނަށް ދޭން ހަމަޖެހިފައިވަނީ މިމަހުގެ 19ވަނަ ދުވަހު ކަމަށެވެ. އަމީރު ވިދާޅުވީ އެފައިސާ މިހާރު މުވައްޒަފުންގެ އެކައުންޓްތަކަށް ޖަމާކޮށްފައިވާ ކަމަށެވެ.

ވަޒީފާއާ ބެހޭ ގާނޫނުގެ 51 ވަނަ މާއްދާގެ (ހ)ގައި ވަނީ، ވަޒީފާ އަދާކުރާ ކޮންމެ ދިވެހި މުވައްޒަފަކަށް ރަމަޟާން މަހުގެ އިނާޔަތުގެ ގޮތުގައި ކޮންމެ އަހަރެއްގެ ރަމަޟާން މަސް ފެށުމުގެ ކުރިން 3,000 ރުފިޔާ ދޭންވާނެ ކަމަށެވެ.

ހަމައެއާއެކު، ވަޒީފާދީގެން މުވައްޒަފުން ގެންގުޅުއްވާ އެންމެހާ ފަރާތްތަކުންވެސް، ރަމަޟާން މަސް ފެށުމުގެ ކުރިން، ވަޒީފާއާބެހޭ ޤާނޫނުގައި ބަޔާންކޮށްފައިވާ ގޮތުގެމަތިން، މުވައްޒަފުންނަށް ރަމަޟާން މަހުގެ ޢިނާޔަތް ދެއްވުމަށް ލޭބަރ ރިލޭޝަންސް އޮތޯރިޓީން ވަނީ އަންގާފައެވެ.

މިއަހަރުގެ ރަމަޟާން މަސް ފެށޭނީ މާދަމާއެވެ.