މިއަހަރުގެ މިހާތަނަށް ރާއްޖެއަށް 480000 އަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު މިއީ މިދިޔަ އަހަރާއި އަޅާބަލާއިރު 22.7 އިންސައްތައިގެ ކުރިއެރުމެއްކަމަށް ޓޫރިޒަމް މިނިސްޓްރީން ހާމަކޮށްފި އެވެ.

ޓޫރިޒަމް މިނިސްޓްރީގެ އެންމެފަހުގެ ތަފާސް ހިސާބުތައް ދައްކާގޮތުން މިމަހުގެ 23 ވަނަ ދުވަހުގެ ނިޔަލަށް ރާއްޖެ ޒިޔާރަތްކޮށްފައިވަނީ 483624 ފަތުރުވެރިންނެވެ. މިއީ މިދިޔަ އަހަރުގެ މި މުއްދަތުގައި ރާއްޖެ އައިސްފައިވާ 113428 ފަތުރުވެރިންނާއި އަޅާބަލާއިރު 22.7 އިންސައްތަ އިތުރު އަދަދެކެވެ.

ތަފާސް ހިސާބަށް ބަލާއިރު މިހާރު އެވްރެޖްކޮށް ދުވާލަކު 5898 ފަތުރުވެރިން ރާއްޖެ ޒިޔާރަތްކުރެއެވެ. އަދި ފަތުރުވެރިންގެ ރާއްޖޭގައި ހޭދަކުރާ މުއްދަތު އުޅެނީ އެވްރެޖްކޮށް 8 ދުވަހުގައެވެ.

Weekly updates on #Maldives Tourism
24 March 2023https://t.co/spUHFbrQt0 pic.twitter.com/WpqBDB36Q2

— Ministry of Tourism (@MoTmv) March 25, 2023

ރާއްޖެއަށް އެންމެ ގިނައިން ފަތުރުވެރިން އަންނަ މާކެޓްތަކަށް ބަލާއިރު، 59987 ފަތުރުވެރިންނާއެކު 1 ވަނައިގައި އުޅެނީ ރަޝިޔާއެވެ. 52276 ފަތުރުވެރިންނާއެކު 2 ވަނައިގައި އުޅެނީ އިންޑިއާއެވެ. އަދި 44839 ފަތުރުވެރިންނާއެކު މާކެޓްގެ 3 ވަަނައިގައި އުޅެނީ އިނގިރޭސިވިލާތެވެ.

ސަރުކާރުން 2022 ވަނަ އަހަރު ރާއްޖެއަށް ގެނައުމަށް އަމާޒުހިފީ 1.6 މިލިއަން ފަތުރުވެރިންނެވެ. މި އަމާޒު ވަނީ ޑިސެމްބަރުމަހުގެ 20 ވަނަ ދުވަހު ހާސިލްވެފައެވެ. އަދި މިއަހަރަށް ސަރުކާރުން އަމާޒުހިފާފައިވަނީ 1.8 މިލިއަން ފަތުރުވެރިން ގެނެސް ފަތުރުވެރިކަމުގެ ރެކޯޑެއް ހެދުމަށެވެ.