ދަރަނި ރިސްޓްރަކްޗާ ކޮށްފިނަމަ ރާއްޖޭގެ ކްރެޑިޓް ރޭޓިން ދަށްވާނެ ކަމަށް މާލީ ވަޒީރު އިބްރާހިމް އަމީރު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މާފަންނު މެދު ދާއިރާގެ މެންބަރު އިބްރާހީމް ރަޝީދު ކުރެއްވި ސުވާލަކަށް ލިޔުމުން ޖަވާބުދެއްވަމުން އަމީރު ވިދާޅުވީ، ރާއްޖޭގެ ދަރަނި ރިސްޓްރަކްޗާ ކޮށްފިނަމަ ރާއްޖޭގެ ކްރެޑިޓް ރޭޓިން ދަށްވާނެ ކަމަށެވެ.

އަމީރު ވިދާޅުވީ، ޤައުމީ އުފެއްދުންތެރިކަމުގެ ނިސްބަތުން ދައުލަތުގެ ދަރަނި 2021 ވަނަ އަހަރުގެ ނިޔަލަށް ހުރީ 118 އިންސައްތައިގައި ކަމަށެވެ. އެއީ ދަޢުލަތުން ސީދާ ނަގާފައިވާ ދަރަނި 100 އިންސައްތަ ކަމަށާއި، އަދި ގެރެންޓީ ކޮށްދީފައިވާ ދަރަނި 18 އިންސައްތަ ކަމަށް އަމީރު ވިދާޅުވިއެވެ. އަމީރު ވިދާޅުވީ 2022 ވަނަ އަހަރު ނިމޭއިރު ރާއްޖޭގެ ޑެޓް ޓު ޖީޑީޕީ ރޭޝިއޯ ހުންނާނީ 111 އިންސައްތައިގައި ކަމަށް ލަފާކުރަށްވާ ކަމަށެވެ.

އަމީރު ވިދާޅުވީ ދަރަނި ރިސްޓްރަކްޗާކުރުމުން ރާއްޖޭގެ ކްރެޑިޓް ރޭޓުކުރާ އޭޖެންސީތަކުން ކްރެޑިޓް ރޭޓިން ދަށްކުރާނެ ކަމަށެވެ. އެކަމުގެ ސަބަބުން ދަރަންޏަށް ފައިސާ ހޯދުމަށް ދިވެހި ސަރުކާރަށާއި ވިޔަފާރިތަކަށް ދަތިވާނެ ކަމަށްވެސް އަމީރު ވިދާޅުވިއެވެ. އެހެންކަމުން ދަރަނި މެނޭޖުކުރުމަށް އެންމެ ރަނގަޅު ގޮތަކީ ދައުލަތުގެ އާމްދަނީ އިތުރުކޮށް ޚަރަދު ކުޑަކުރުން ކަމަށާއި ސަރުކާރުގެ ފިސްކަލް ޕޮލިސީ އެކުލަވާލާފައިވަނީ އެކަންކަން ހިމަނައިގެން ކަމަށް އަމީރު މިއަދު ވިދާޅުވިއެވެ.

ރާއްޖޭގެ ކްރެޑިޓް ރޭޓުކުރާ ފިޗުން ނިމުނު އަހަރުގެ އޮކްޓޯބަރު މަހުގައި ބުނެފައިވަނީ ރާއްޖޭގެ ރޭޓިންއަކީ "ބީ މައިނަސް" ރޭޓިންއެއް ކަމަށެވެ. އަދި މޫޑީސްއިން ރާއްޖޭގެ ކުރެޑިޓް ރޭޓިންއެއްކަމަށް ކަނޑައަޅާފައިވަނީ "ސީއޭއޭ"އެވެ.

ދައުލަތުގެ ދަރަނި ބޮޑުވަމުންދާއިރު ސަރުކާރުން ބުނަނީ ދަރަނި ދެއްކުމުގެ ގާބިލްކަން ސަރުކާރުގައި އެބަހުރިކަމަށެވެ. އަދި ދަރަނި ނުދެއްކިގެން ގައުމު ބަނގުރޫޓްވާ ހާލަތަށް ނުދާނެކަމަށްވެސް ސަރުކާރުން ދަނީ ބުނަމުންނެވެ.