ރާއްޖެއިން ކޮވިޑް-19 ގެ ކޭސްތަކެއް ފެނުމާއި ގުޅިގެން ރާއްޖޭގެ ހުރިހާ ސްކޫލްތަކާއި ކޮލެޖް އަދި ޔުނިވަރސިޓީގެ ކިޔެވުން މެނދުކެނޑާލާފައި އޮތުމަށްފަހު ސްކޫލް، ކޮލެޖް އަދި ޔުނިވަރސިޓީތަކުގައި މިއަދު ކިޔަވައިދޭން ފަށައިފިއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންތަކާއެކު ސްކޫލްތަކުގައި ކިޔަވައިދޭން މިއަދު ކިޔަވައިދޭން ފަށާފައިވާއިރު އެޑިއުކޭޝަން މިނިސްޓްރީ އިން ބުނީ ކޮވިޑް-19 ފެނިފައިވާ ރަށްރަށުގައި ކިޔަވައި ދިނުމަށް ހަމަޖެހިފައިވަނީ ކީ ސްޓޭޖް 4 އަދި 5 (ގްރޭޑް 9-12) ގެ ދަރިވަރުންނަށް ކަމަށެވެ. އެގޮތުން ސްކޫލްތައް ހިންގާނެ ގޮތް ކަނޑައަޅާނީ އެޑިއުކޭޝަން މިނިސްޓްރީ އާއި ސްކޫލްތަކާ ގުޅިގެންނެވެ.

އެޗްޕީއޭގެ ގައިޑްލައިންގައި އިރުޝާދު ދީފައިވަނީ ކީ ސްޓޭޖްތަކުގެ ދަރިވަރުން ސްކޫލަށް ހާޒިރުވި ކަމުގައިވިޔަސް ޓެލިކްލާހާއި، އޮންލައިން، ގޫގްލް ކްލާސް ވެސް ކުރިއަށް ގެންދިޔުމަށެވެ. އަދި ކޮންމެ ސެޝަނެއް ކުރިޔަށް ގެންދެވޭނީ 4 ގަޑިއިރަށް ކަމަށާއި، ދަރިވަރުން ސްކޫލަށް ހާޒިރުވެގެން ކިޔަވަން ޖެހޭނީ ހަފްތާއަކު 4 ދުވަހު ކަމަށް ވެސް ވަނީ ކަނޑައަޅާފައެވެ.

މީގެ އިތުރުން ދަރިވަރުން އަދި ސްކޫލްގައި މަސައްކަތް ކުރާ އެންމެހާ މުވައްޒަފުން ވެސް މާސްކް އެޅުމާއި، ސްކޫލަށް ވަންނަން ހުންނަ ޕޮއިންޓްތަކުގައި ޓެމްޕަރޭޗަރ ބަލައި ސްކްރީން ކުރުން އަދި ސްކޫލް އެސެމްބްލީތަކާއި، އިތުރު ޙަރަކާތްތައް ހިންގުން ގައިޑްލައިންގައިވަނީ މަނާކޮށްފައެވެ. އަދި މަދުވެގެން އެކަކު އަނެކަކާ ދެމެދުގައި 3 ފޫޓުގެ ގައިދުރުމިން ފަރިތަކުރުމަށް ވެސް އެޗްޕީއޭގެ ގައިޑްލައިންގައި ވަނީ އަންގާފައެވެ.

އެޗްޕީއޭ އިން ވަނީ ސްކޫލްގައި އަތް ދޮވެވޭނެ ނުވަތަ ސެނިޓައިޒް ކުރެވޭނެ އިންތިޒާމް ހަމަޖެހިފައި ހުރުމާއި، ކޮންމެ ސެޝަނެއް ނިންމާލުމަށްފަހު ޤަވާއިދުން ކްލާސް ރޫމްތައް ޑިސްއިންފެކްޓްކޮށް ކޮންމެ ދުވަހަކު އެއްފަހަރު ކްލާސްރޫމްތައް ސާފުކުރުމަށް ވަނީ އަންގާފައެވެ. އަދި ހަފްތާ ބަންދުގައި ކްލާސްރޫމްތައް "ޑީޕް ކްލީން" ކުރުމަށްފަހު ޑިސްއިންފެކްޓް ކުރުމަށް އެޗްޕީއޭއިން ވަނީ އަންގާފައެވެ.

މީގެ އިތުރުން ފައުންޑޭޝަން ސްޓޭޖުން ފެށިގެން ކީ ސްޓޭޖް 3 (ޕްރީ ސްކޫލުން ފެށިގެން ގްރޭޑް 8 ގެ ދަރިވަރުން) ސްކޫލަށް ހާޒިރުނުވި ކަމުގައިވިޔަސް ޓެލިކްލާހާއި، އޮންލައިން ގޫގްލް ކްލާހުގައި ބައިވެރިވުމާއި، އައިސޮލޭޝަން، ކަރަންޓީން، އަދި އިތުރު ސަބަބަކާއި ހުރެ ސްކޫލަށް ހާޒިރުވާން އުޒުރުވެރިވާ ނަމަ ޓެލިކްލާހާއި، އޮންލައިން ގޫގްލް ކްލާހުގައި ބައިވެރިވުމަށް ވަނީ އަންގާފައެވެ.

އެޑިއުކޭޝަން މިނިސްޓްރީން ކަނޑައަޅާ އުޞޫލާ އެއްގޮތަށް ސެން ކްލާހުގައި ދަރިވަރުންނަށް ކިޔަވާ ދިނުމަށް ވެސް ނިންމާފައިވެއެވެ. މީގެއިތުރުން ކޮވިޑް-19 ފެނިފައިނުވާ ރަށްރަށުގައި ކިޔެވުން ހަމަޖެހިފައިވަނީ ކީ ސްޓޭޖް 1ން ފެށިގެން 5ށް (ގްރޭޑް 1-12) ގެ ދަރިވަރުންނަށެވެ. އަދި އެފަދަ ސްކޫލްތައް ހިންގާނެ ގޮތް ކަނޑައަޅާނީ އެޑިއުކޭޝަން މިނިސްޓްރީއާއި ސްކޫލްތަކުން ގުޅިގެންނެވެ.

މަތީ ތަޢުލީމާއި ތަމްރީން ދޭ ތަންތަނުން މިނިސްޓްރީ އޮފް ހަޔަރ އެޑިޔުކޭޝަނުން ކަނޑައަޅާ އުޞޫލާ އެއްގޮތަށް ކިޔެވުން ކުރިއަށް ގެންދިއުމަށް ވަނީ އަންގާފައެވެ. އަދި މަރުކަޒަށް ކިޔަވައިދޭ ޓީޗަރުން، މުވައްޒަފުން އަދި ދަރިވަރުން ޙާޒިރުވާނަމަ، މާސްކް ބޭނުން ކުރުމުގައި ހެލްތް ޕްރޮޓެކްޝަން އެޖެންސީގެ 'މާސްކް އެޅުމުގައި ޢަމަލު ކުރާ ގޮތުގެ އުސޫލާ އެއްގޮތަށް ޢަމަލު ކުރުމަށްވެސް ވަނީ އަންގާފައެވެ.