އިންޓަގްރޭޓެޑް ޓޫރިޒަމް ކޮންސެޕްޓަށް އައްޑޫ ހަންކެޑެ ތަރައްގީ ކުރުމުގެ މަަސައްކަތް މޯލްޑިވްސް ފަންޑް މެނޭޖްމެންޓް ކޯޕަރޭޝަނުން ޗައިނާގެ ކުންފުންޏަކާ މިއަދު ހަވާލުކޮށްފި އެވެ.

ބޭންކް އޮފް ޗައިނާގެ 142.9 މިލިއަން ޑޮލަރު (2.2 ބިލިއަން ރުފިޔާ) ގެ ލޯނެއްގެ ދަށުން މިމަސައްކަތް ހަވާލުކުރީ ޗައިނާ ނެޝަނަލް އިލެކްޓްރިކަލް އިންޖިނިއަރިން ކުންފުންޏާ އެވެ.

މޯލްޑިވްސް ފަންޑް މެނޭޖްމަންޓް ކޯޕަރޭޝަނުން ބުނީ ހަންކެޑެ އިންޓަގްރޭޓެޑް ޓޫރިޒަމް ޕްރޮޖެކްޓާއެކު އައްޑޫގެ ފަތުރުވެރިކަން މުޅިން އެހެން ހަރުފަތަކަށް ގެންގޮސް، އިންގިލާބީ ކުރިއެރުންތަކެއް ލިބިގެންދާނެކަމަށެވެ. މީގެއިތުރުން ވަޒީފާގެ ފުރުސަތުތަކާއި ކުދި ވިޔަފާރިތައް ކުރިއެރުވުމަށްވެސް ފުރުސަތުތަކެއް ހުޅުވިގެންދާނެ ކަމަށް އެ ކުންފުނިން ބުނެއެވެ.

މިމަސައްކަތް ނިންމުމަށް ހަމަޖެހިފައިވަނީ ދެ އަހަރު ދުވަހުގެ ތެރޭގައެވެ.



މޯލްޑިވްސް ފަންޑް މެނޭޖްމަންޓް ކޯޕަރޭޝަނަކީ، ރާއްޖެއާއި ރާއްޖެއިން ބޭރުގެ އިންވެސްޓަރުންނަށް ރާއްޖޭގައި ފަސޭހައިން އިންވެސްޓް ކުރެވޭފަދަ އިންތިޒާމެއް ހަމަޖެއްސެވުމުގެ ގޮތުން އުފައްދާފައިވާ 100 އިންސައްތަ ދިވެހި ސަރުކާރު ހިއްސާވާ ކުންފުންޏެކެވެ.

ހަންކެޑެ އިންޓަގްރޭޓެޑް ޓޫރިޒަމް ޕްރޮޖެކްޓަކީ 1041 ކޮޓަރި ހިމެނޭ މަޝްރޫއެކެވެ. އޭގެތެރޭގައި ފަތުރުވެރިކަމުގެ އެކިބާވަތްތަކުގެ ކޮޓަރިތައް ހިމެނޭނެކަމަށްވެސް މޯލްޑިވްސް ފަންޑް މެނޭޖްމަންޓް ކޯޕަރޭޝަނުން ބުނެއެވެ.

އައްޑޫގައި ޓޫރިޒަމް ފުޅާކުރަން ކުރިއަށް ގެންދާ މަސައްކަތުގެ ތެރެއިން ލިންކް ރޯޑުން ގުޅިފައި އޮންނަ މަރަދުއާއި ގައުކެނޑިއާ ދޭތެރޭ އޮންނަ ހަންކެޑެގައި ފަތުރުވެރިކަން ތަރައްގީކުރުމަކީ ރައީސް ސާލިހުގެ ވައުދެކެވެ.

ކުރީ ސަރުކާރުތަކުންވެސް ހަންކެޑެގައި ފަތުރުވެރިކަން ތަރައްގީކުރުމަށް އެކި މަޝްރޫއުތައް އިއުލާންކޮށްފައި އެބަހުއްޓެވެ. ނަމަވެސް އެއްވެސް ސަރުކާރަކުން މިހާތަނަށް އައިއިރު އެ މަސައްކަތްތައް ނިންމާފައެއް ނުވެއެވެ.