ރާއްޖެއަށް ޑްރަގް އެތެރެކުރާ ގިނަ ބިދޭސީންނަކީ ބޮޑެތިބަލިތަކުގެ މީހުން ކަމަށާއި އެމީހުން ބަލަހައްޓަން ދަޢުލަތުން ބޮޑު ޚަރަދެއް ކުރަންޖެހޭ ކަމަށް ދިފާޢީ ވަޒީރު މާރިޔާ އަޙްމަދު ދީދީ މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ކުރެއްވި ސުވާލަކަށް ޖަވާބު ދެއްވަމުން މިނިސްޓަރ މާރިޔާ ވިދާޅުވީ، ރާއްޖެއަށް މަސްތުވާތަކެތި އެތެެރެކުރާ ބިދޭސީން ރާއްޖެއަށް އެތެރެވިޔަނުދީ އަނބުރާ ފޮނުވައިލާ ގޮތަށް އިމިގްރޭޝަނުން ގަވައިދެއް އެކުލަވާލީ، މަސްތުވާތަކެތި ހިފައިގެން ރާއްޖެއަށް އަންނަ ގިނަ މީހުންނަކީ ބޮޑެތި ބަލިތައް ޖެހިފައި ތިބޭ މީހުންނަށް ވާތީ ކަމަށެވެ.

މިނިސްޓަރ ވިދާޅުވީ، އެފަދަ މީހުން ބެލެހެއްޓުމަށް ދަޢުލަތުން ބޮޑު ހޭދައެއް ކުރަންޖެހޭ ކަމަށާއި، ޤަވާއިދު ހެދުމުގެ ކުރިން ވެސް އެފަދަ ބިދޭސީން ބަންދުނުކޮށް އަނބުރާ ފޮނުވައިލާ ކަމަށެވެ. ނަމަވެސް ސަރުކާރުން ގަވައިދެއް އެކުލަވާލީ ދެފުށް ފެންނަ ގޮތަކަށް އެކަން ކުރުމަށް ކަމަށް މާރިޔާ ވިދާޅުވިއެވެ.

"މަސްތުވާތަކެތި ހިފައިގެން ގިނައިން އަންނަނީ ޓަރމިނަލް އިލްނަސަސް ހުރި މީހުން، އެގޮތުން އެއިޑްސް ޖެހިފައި ތިބި މީހުންނާއި ކިޑްނީގެ ބޮޑެތި ބަލިތަކުގެ މީހުންނާ، އެކަހަލަ އެތައް ބައެއް މިވަގުތު ވެސް އެބަތިބި ޖަލުގައި. ދެން ރައްޔިތުންގެ ވަރަށް ބޮޑު ހަރަދަކުން (އެމީހުން) މި ބަލަހައްޓަން ޖެހެނީ." މާރިޔާ މިއަދު ވިދާޅުވިއެވެ.

މާރިޔާ ވިދާޅުވީ، މަސްތުވާތަކެތީގެ ގާނޫނަށް ފަހުން ގެނެވުނު އިސްލާޙުން އެފަދަ މީހުން ކޯޓުގެ ހުކުމް ނިމުމުން އަނބުރާ ފޮނުވާލެވޭގޮތަށް ހަމަޖެހިފައިވާ ކަމަށެވެ. ނަމަވެސް އެމީހުން ގިނަ ދުވަހު ޖަލުގައި ބޭތިއްބުމުން އިތުރަށް ކުރިމަތިވާ ގޮންޖެހުންތަކެއްވެސް ހުންނަކަމަށް މާރިޔާ ވިދާޅުވިއެވެ.

ސަރުކާރުން ގެޒެޓުކޮށްފައިވާ އިމިގްރޭޝަންގެ އެ ގަވާއިދުގައި ބުނެފައިވަނީ ވައިގެ މަގުން ރާއްޖެއަށް އަންނަ ބިދޭސީއަކު މަސްތުވާއެއްޗެއް އެތެރެކުރަން އުޅޭކަން ޝައްކުކުރެވޭނަމަ އެމީހަކު ރާއްޖެއަށް އެތެރެވުމުގެ ހުއްދަނުދީ ހިފެހެއްޓުމުގެ އިޚްތިޔާރު، ކޮންޓްރޯލާ އޮފް އިމިގްރޭޝަނަށް ލިބިގެންވާ ކަމަށެވެ.

އަދި އެމީހަކު ރާއްޖެއަށް އައި އެއާލައިނަކުން އޭނާއަަށް އެނބުރި ގައުމަށް ފުރޭނެ އިންތިޒާމު ހަމަޖައްސަންވާނެ ކަމަށްވެސް ޤަވާއިދުގައި ކަނޑައަޅާފައިވެއެވެ.