މިފްކޯގެ މަސްގަތުމުގެ ކެޕޭސިޓީ އިތުރުކުރުމަށްޓަކައި އިތުރު 3 ބޯޓު އަންނަ ޖުލައިމަހު ގެންނާނެ ކަމަށް މިފްކޯގެ ސީއީއޯ އިސްމާއީލް ފައުޒީ ވިދާޅުވެއްޖެއެވެ.

ރާއްޖޭގެ މީޑިއާއެއްގައި ރޭ ވާހަކަދައްކަވަމުން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ، މިފްކޯގެ ސީއީއޯ ފައުޒީ ވިދާޅުވީ ރާއްޖޭގެ އުތުުރުގެ މަސްވެރިކަމަށް ހާއްސަކޮށްގެން އިތުރު 3 ބޯޓު ގެނައުމުގެ މަސައްކަތް ކުރަމުންދާކަމަށެވެ.

އެގޮތުން މިއިން ކޮންމެ ބޯޓަކަށް ބްރައިން ފްރީޒިން ކެޕޭސިޓީގެ 60 ޓަނު އިތުރު ކުރެވި ޖުމްލަ 180 ޓަނު ދުވާލެއްގެ މައްޗަށް ގަނެވޭނެ ކަމަށް ފައުޒީ ވިދާޅުވިއެވެ. އަދި މި ތިން ބޯޓު އެއްކޮށްގެން 270 ޓަނު ކެޕޭސިޓީ ކަލެކްޓަރ ވެސަލްތަކުގައި އިތުރު ކުރެވޭނެ ކަމަށް ވިދާޅުވިއެވެ.

ނޮވެންބަރު މަހުން ފެށިގެން މަސްވެރިކަން ރަނގަޅުވާން ފަށާފައިވާކަމަށާއި، މަސްވެރިން ވަރަށް ދުރުންވެސް މަސް ކިރުވަން އަންނަކަމަށް ފައުޒީ ވިދާޅުވިއެވެ. އެގޮތުން ދުވާލަކު 350 އާއި 400 ޓަނުގެ މަސް ކިރާކަމަށް އޭނާ ވިދާޅުވިއެވެ.

މިފްކޯއިން މިމަހުވަނީ ދުވާލަކު 120 ޓަނުގެ މަސް ކިރުވޭ ޖަޒީރާ 103 ބޯޓު ރާއްޖެއަށް ގެނެސްފައެވެ. އެގޮތުން މި ބޯޓު ރާއްޖޭގައި ރެޖިސްޓްރީ ކުރުމުގެ މަސައްކަތް މިހާރު ކުރެވެމުންދާ ކަމަށާއި، މިމަހުގެ ފަހު ހަފްތާތެރޭ ބޯޓު އޮޕަރޭޝަނަށް ނެރެވޭނެ ކަމަށް ފައުޒީ ވިދާޅުވިއެވެ.

މިފްކޯއިން ބުނީ "ޖަޒީރާ 103" ބޯޓަކީ ދުވާލަކު 120 މެޓްރިކް ޓަނު މަސްގަނެ ފިނިކުރުމުގެ ގާބިލުކަން ލިބިފައިވާ، ޖުމްލަ 420 މެޓްރިކް ޓަނުގެ މަސް ސްޓޯކުރެވޭ ބޯޓެއްކަމަށެވެ. މަސް ކިރުމަށް މިފްކޯގައި މިހާރު އޮންނަ ދެ ބޯޓަކީ 100 ޓަނުގެ ޖަޒީރާ 102 އާއި 90 ޓަނުގެ މަހާ ކަލަމިންޖާއެވެ.

ސަރުކާރުން ދަނީ މަސްވެރިންނަށް މަސްކިރުމުގައި ދިމާވާ ދަތިތައް ހައްލުކޮށްދިނުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިފްކޯއަށް މަސް ގަންނަ މިންވަރު އިތުރުކުރުމަށް އެކިއެކި މަޝްރޫއުތައް ދަނީ ހިންގަމުންނެވެ.

އޭގެތެރޭގައި ފެލިވަރުގައި 4000 ޓަނުގެ މަސް ރައްކާކުރެވޭނެ ކޯލްޑް ސްޓޯރޭޖަކާއި، ދުވާލަކު 200 ޓަނުގެ މަސް ގަނޑު ކުރެވޭނެ ބްރައިން ފްރީޒިންގ ފެސިލިޓީއެއް ޤާއިމްކުރުން ހިމެނެއެވެ.