ރައްޔިތުންގެ މަޖިލީހުގެ މަޑަވެލީ ދާއިރާގެ މެންބަރު ޙުސައިން ފިރުޝާން ރައްޔިތުންގެ މަޖިލީހަށް ހުށައެޅުއްވި މަސްވެރިކަމާގުޅޭ ޤަރާރުގެ ބޭނުން ފެންނަން ފަށައިފިކަމަށް ވިދާޅުވެ އެމްޑީޕީގެ ކުރީގެ ޗެއަރޕަރސަން ޙަސަން ލަތީފް މެންބަރު ފިރުޝާނަށް ހިތްވަރުދެއްވައިފިއެވެ.

ސައުދީ ފަންޑް ފޯ ޑިވެލޮޕްމަންޓްގެ އެހީގައި ތިން ރަށެއްގައި ކޯލްޑް ސްޓޯރޭޖް ގާއިމްކޮށްދޭނެ ބަޔަކު ހޯދަން ފިނޭންސް މިނިސްޓްރީން އިޢުލާނު ކުރުމާގުޅިގެން ޙަސަން ލަތީފް ވިދާޅުވީ ފެނިގެން މިދަނީ މަޖިލީހުގައި ސަރުކާރު ޖަވާބުދާރީ ކުރުމަށް ކުރެވުނު މަސައްކަތުގެ ނަތީޖާ ކަމަށެވެ.

ޚާއްސަކޮށް މަޑަވެލީ ދާއިރާގެ މެންބަރު ޙުސައިން ފިރުޝާން މަސްވެރިކަމުގެ މައްސަލަތައް މަޖިލީހުގެ ސަމާލުކަމަށް ގެނައުމަށް ހުށައެޅުއްވި ޤަރާރު މިކަމުގައި މުހިއްމުރޯލެއް ކުޅެފައިވާކަމަށް ޙަސަން ލަތީފް ވިދާޅުވިއެވެ.

ފިނޭންސް މިނިސްޓްރީން އިޢުލާންކޮށްފައިވަނީ ގއ. ކޫއްޑޫ، ކ. ކަނޑުއޮތްގިރި އަދި މ. މުލަކުގައި ކޯލްޑް ސްޓޯރޭޖް އެންޑް އެސޯސިއޭޓެޑް އެންސިލަރީ ފެސިލިޓީސް ޑިވެލޮޕް ކުރުމުގެ މަސައްކަތް ކޮށްދޭނެ ފަރާތެއް ހޯދުމަށެވެ.

މި މަޝްރޫއު ކުރިއަށްގެންދިޔުމަށް ހަމަޖެހިފައިވަނީ 3 ލޮޓަކަށް ބަހާލައިގެންނެވެ. އެގޮތުން ކޫއްޑޫގައި އިތުރު 4000 ޓަނުގެ ކޯލްޑް ސްޓޯރޭޖް ކެޕޭސިޓީއާއި ޕަވަރ އިމްޕްރޫވްމަންޓްގެ މަސައްކަތާއި ކަނޑުއޮތްގިރީގައި 200 ޓަނުގެ ކޯލްޑް ސްޓޯރޭޖް ކެޕޭސިޓީއާއި ބްލާސްޓް ފްރީޒިންގް ފެސިލިޓީގެ މަސައްކަތުގެ އިތުރުން މުލަކުގައި 500 ޓަނުގެ ކޯލްޑް ސްޓޯރޭޖް ޑިވެލޮޕް ކުރުމުގެ މަސައްކަތް ހިމެނެއެވެ.

ހޮރައިޒަން ފިޝަރީޒަށް ގދ. ހޯނޑެއްދޫ ބިމުން 13.5 ހެކްޓަރުގެ ބިން ހަވާލުކޮށްފައި އޮންނަތާ މި އަހަރުގެ ނިޔަލަށް 17 އަހަރު ފުރިގެންދާ ކަމަށާއި އެތަން އޮޕަރޭޝަނަށް ނުގެނެވި އިތުރު އިންވެސްޓްމަންޓްތަކަކަށް ހަރަދުކުރާ މައްސަލާގައި ފިރުޝާން ވަނީ ރައްޔިތުންގެ މަޖިލީހަށް ޤަރާރު ހުށައަޅުއްވައިގެން ދެކުނުގެ މަސްވެރިކަމަށް އިތުރަށް އިންވެސްޓް ކުރުމަށް ސަރުކާރަށް ގޮވާލައްވާފައެވެ.