ރާއްޖެ އަށް ފަސް ކިލޯގެ ޑްރަގް ގެނައި އުމުރުން 56 އަހަރުގެ އިންޑިއާ އަންހެން މީހާގެ ބަންދަށް ކްރިިމިނަލް ކޯޓުން 15 ދުވަސް ދީފި އެވެ.

މިމަހުގެ 12 ވަނަ ދުވަހު ވެލާނާ އިންޓަނޭޝަނަލް އެއާޕޯޓުން ހައްޔަރުކުރި ލަލްތުލަންޕަރިގެ ބަންދަށް އެންމެ ފުރަތަމަ ކޯޓުން ދިނީ ތިން ދުވަހެވެ. އެއީ އޭނާގެ ދިފާއަށް ފުރުސަތު ދިނުމުގެ ގޮތުން ތަރުޖަމާނަކާއެކު ގެންނަން ދިން މުއްދަތެކެވެ.

މި މަސްތުވާ ތަކެތި ރާއްޖެއަށް އެތެރެކޮށްފައިވަނީ ވައިގެ މަގުން އިތިއޯޕިއާއިން ރާއްޖެ އައި އިންޑިއާގެ އުމުރުން 56 އަހަރުގެ އަންހެން ފަސިންޖަރެއްގެ އަތުން މިމަހުގެ 12 ވަނަ ދުވަހު ކަމަށެވެ.

އެ ތަކެތި ފުރަތަމަ މަރުޙަލާގައި ކަސްޓަމްސުން ތަޙުލީލުކުރިއިރު، އަތްދަބަހުން ފެނުނު ތަކެތި މަސްތުވާތަކެތީގެ ބާވަތެއް ކަމަށްވާ ކޮކެއިނަށް ވަނީ ޕޮޒިޓިވްވެފައި ކަމަށާއި އަދި ލަގެޖުން ފެނުނު ތަކެތި މަސްތުވާތަކެތީގެ ބާވަތެއް ކަމަށްވާ ހެރޮއިނަށް ވަނީ ޕޮޒިޓިވްވެފައިވާކަމަށް ކަސްޓަމުން ބުނެއެވެ.

މި ފަސިންޖަރުންގެ އަތްދަބަހާއި ފޮށީގައި ރައްކާކޮށްފައި ހުރި 1.180 ކިލޯ ކޮކެއިން އަދި 4.2 ކިލޯ ހެރޮއިން އާއެކު ޖުމްލަ 5.380 ކިލޯގެ މަސްތުވާތަކެތި އަތުލައިގެންފައިވާއިރު، މިތަކެތީގެ މަގުމަތީ އަގު 9 މިލިއަން ރުފިޔާއަށް ވުރެ މަތިވާނެކަމަށް ލަފާކުރެވޭކަމަށްވެސް ކަސްޓަމުން ބުނެއެވެ.

މި މައްސަލަ އިތުރަށް ތަޙްޤީޤުކުރުމަށްޓަކައި، މި ފަސިންޖަރާއި އޭނާގެ އަތުން އަތުލައިގަނެވުނު މަސްތުވާތަކެތި ކަސްޓަމުން ވަނީ ދިވެހި ފުލުހުންނާ ޙަވާލުކޮށްފައެވެ.