ތ.ފުނައްޑޫ އަލުން އޮޕަރޭޝަނަށް ގެނައުމަަށް މިފްކޯއާ ހަވާލުކޮށްފިއެވެ.

ފުނައްޑޫއަކީ މަސްގަނެ އެކްސްޕޯޓް ކުރުމަށް ކުރީގެ ހޯމް މިނިސްޓަރު އަޙްމަދު ތަސްމީން ޢަލީއަށް ސަރުކާރުން 2004 ވަނަ އަހަރު ދޫކުރި ރަށެކެވެ. ނަމަވެސް ފުނައްޑޫ ރަހުނު ކުރުމަށްފަހު ބޭންކް އޮފް މޯލްޑިވްސް އިން ނެގި ލޯނު ނުދެއްކުމުން ރަށް ވިއްކާލަން ބޭންކުން އިޢުލާން ކުރިއެވެ. އެއާއެކު ފުނައްޑޫ ސަރުކާރަށް ގަނެ މިފްކޯގެ ދަށަށް ބަދަލުކޮށްފައިވަނީ މި އަހަރުގެ މާޗު މަހުގައެވެ.

ފުނައްޑޫއިން އަލުން މަސްގަތުމުގެ މަސައްކަތް ފެށުމަށް މިފްކޯއަށް ހަވާލުކުރުމުގެ އެއްބަސްވުމުގައި މިއަދު ސޮއިކޮށްފައިވާއިރު، އެއްބަސްވުމާއި ގުޅޭގޮތުން މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ ވިދާޅުވީ، ފައިނޭންސް ލިބުނުހާ އަވަހަކަށް ފުނައްޑޫ އޮޕަރޭޝަނަށް ގެނައުމުގެ މަސައްކަތް ފަށާނެކަމަށެވެ. އެގޮތުން ފުނައްޑޫގެ ބަނދަރު އެއްކޮށް ހަލާކުވެފައިވާ ކަމަށާއި، އެރަށުގައި ހުރި ފެސިލިޓީތަކަށް އެހެނިހެން ބަދަލުތައްވެސް ގެންނަންޖެހޭ ކަމަށް ފައުޒީ ވިދާޅުވިއެވެ.

މިދިޔަ އަހަރު ރައްޔިތުންގެ މަޖިލީހުގައި ފިޝަރީޒް މިނިސްޓަރ ޑރ. ޙުސައިން ރަޝީދު ޙަސަން ވިދާޅުވެފައިވަނީ، ފުނައްޑޫ އޮޕަރޭޝަނަށް ގެނެވޭނީ 10.2 މިލިއަން ޑޮލަރު ނުވަތަ 157.3 މިލިއަން ރުފިޔާ ލިބިގެންކަމަށެވެ. މިނިސްޓަރ އޭރު ވިދާޅުވެފައިވަނީ ފުނައްޑޫ އޮޕަރޭޝަނަށް ގެންނަން ބޭނުންވާ ފައިސާ ލިބިގެން، މިއަހަރުގެ މެއި މަހުގެ ތެރޭގައި އެރަށުން މަސް ގަންނަން ފެށޭނެކަމަށެވެ.

ފުނައްޑޫގައި މަސް ގަތުމުގެ އޮޕަރޭޝަންތައް ހުއްޓާލީ 2008ގައެވެ.