ބެސްޓް ޓޫރިޒަމް ވިލެޖަށް ވާދަކުރުމުގެ މުއްދަތު އިތުރުކޮށްފިއެވެ.

ދުނިޔޭގެ ފަތުރުވެރިކަމުގެ ޖަމިއްޔާ، ޔޫއެންޑަބްލިއުޓީއޯއިން ކުރިއަށް ގެންދާ ބެސްޓް ޓޫރިޒަމް ވިލެޖަސްއަށް ޕްރޮޕޯސަލް ހުށަހެޅުމުގެ ފުރުސަތު މިއަހަރު ރާއްޖެއަށް ލިބިފައިވާކަމަށާއި، އެގޮތުން ޝަރުތު ހަމަވާ 8 ރަށަކަށް އެފުރުސަތު ދިނުމަށް ނިންމާފައިވާ ކަމަށް ފަތުރުވެރިކަމާބެހޭ ވުޒާރާއިން ވަނީ ހާމަކޮށްފައެވެ.

ބެސްޓް ޓޫރިޒަމް ވިލެޖަސްއަކީ ރަށްފުށުގައި ދުޅަހެޔޮ ދިރުއުޅުމެއް މަގުފަހިކޮށް، ފަތުރުވެރިކަން ބޭނުންކުރުމަށް ހިތްވަރު ދިނުމަށްޓަކައި ރަށްފުށުގެ ފަތުރުވެރިކަމަށް އަމާޒުކޮށްގެން ކުރިއަށް ގެންދާ ޕްރޮގްރާމެކެވެ. މި ޕްރޮގްރާމްގެ ދަށުން މިހާތަނަށް 40 ގައުމަކުން 70އަށްވުރެ ގިނަ އަވަށާއި ރަށް ދުނިޔޭގެ ފެންވަރުގައި ފާހަގަކޮށްފައިވެއެވެ.

ދިވެހިރާއްޖޭގެ ކުދިރަށްރަށުގައި ފަތުރުވެރިކަން ކުރިއެރުވުމަށް މިވަގުތުއޮތް އެންމެބޮޑު ޗެލެންޖަކީ ގެސްޓްހައުސްތައް މާރކެޓް ކުރުމަށް އޮތް ދަތި ކަމަށާއި އިންޓަނޭޝަނަލް ޕްލެޓްފޯމްތަކުގައި ރަށްތަކެއް ފާހަގަކުރެވިގެންދާއިރު، އެރަށްރަށް މާރކެޓް ކުރުމަށްވެސް، އިޝްތިހާރު ކުރުމަށް ބޮޑު ފުރުސަތުތަކެއް ލިބޭނެ ކަމަށް ޓޫރިޒަމް މިނިސްޓްރީން ބުނެއެވެ.

ބެސްޓް ޓޫރިޒަމް ވިލެޖަސް 2023 އަށް ވާދަކުރުމަށް ބޭނުންވާ އެޕްލިކޭޝަން ފޯމާއި، "ކެންޑިޑެސީ ޑޮކިއުމެންޓް" ފުރިހަމަކުރުމާއި، ވީޑިއޯ އަދި ޖެނެރަލް ޕްރެޒެންޓޭޝަން ތައްޔާރުކުރުމުގައި ޓޫރިޒަމް މިނިސްޓްރީން އެހީތެރިވާނެ ކަމަށް މިނިސްޓްރީން މަޢުލޫމާތުދެއެވެ.

މިޕްރޮގްރާމްގައި ވާދަކުރަން ޝައުގުވެރިވާ ރަށްރަށުގެ ކައުންސިލްތަކަށް މިމަހުގެ 25ވާ އަންގާރަ ދުވަހުގެ 12:00ގެ ކުރިން އެ މިނިސްޓްރީއަށް ނަން ހުށަހެޅުމުގެ ފުރުސަތު ވަނީ ހުޅުވާލާފައެވެ.