ފަސް ރަށެއްގައި އައިސް ޕްލާންޓް ގާއިމްކުރުމުގެ މަސައްކަތް ފެނަކަ ކޯޕަރޭޝަނާއި ޙަވާލުކޮށްފިއެވެ.

ފެނަކައިން ރަށްރަށުގައި ފޯރުކޮށްދޭ ހިދުމަތްތަކުގެ ތެރެއަށް، މަސްވެރިންނަށް ބޭނުންވާ އައިސް ފޯރުކޮށްދިނުމުގެ ހިދުމަތް އިތުރު ކުރުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ނިންމެވުމާ ގުޅިގެން، ޒަމާނީ ޓެކްނޯލޮޖީގެ އެހީގައި މަސްވެރިންނަށް ފަސޭހަ ހިދުމަތްތަކެއް ފޯރުކޮށްދެވޭނެ މަގުފަހިކުރުމުގެ މަސައްކަތް ފެނަކައިން ވަނީ ފަށާފައެވެ.

ފިޝަރީޒް މިނިސްޓްރީން ބުނީ، ފެނަކަ ކޯޕަރޭޝަނާއި މިއަދު ޙަވާލު ކޮށްފައިވަނީ ހއ. ދިއްދޫ، ގދ. ރަތަފަންދޫ، އއ. ރަސްދޫ، ދ. މީދޫ އަދި ލ. މާމެންދޫގައި އައިސްޕްލާންޓް ޤާއިމުކުރުމަށް ކަމަށެވެ.

މި 5 ރަށުގައި ޤާއިމްކުރުމަށް ހަމަޖެހިފައިވަނީ 25 ޓަނުގެ އައިސްޕްލާންޓެވެ. އެ އައިސްޕްލާންޓްތައް ސަޕްލައިކޮށް އިންސްޓޯލް ކޮށްދިނުމުގެ މަސައްކަތުގެ އެއްބަސްވުމުގައި ފިޝަރީޒް މިނިސްޓްރީ އާއި ފެނަކަ ކޯޕަރޭޝަނާ ދެމެދު މިއަދު ވަނީ ސޮއި ކޮށްފައެވެ. މިއެއްބަސްވުމުގައި ފިޝަރީޒް މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް އަޙްމަދު ޔާމީނެވެ. އަދި ފެނަކަ ކޯޕަރޭޝަންގެ ފަރާތުން އެއްބަސްވުމުގައި ސޮއިކުރައްވާފައިވަނީ އެ ކޯޕަރޭޝަންގެ ސީ.އީ.އޯ އަޙްމަދު ސަޢީދު މުޙައްމަދެވެ.

ފެނަކައިގެ އައިސް ޕްލާންޓްތައް މިވަގުތު ހުރީ ޖުމްލަ 14 ރަށެއްގައެވެ. އެއީ ހއ.އިހަވަންދޫ، ނ.ޅޮހި، ރ.އަލިފުށި، ބ.ތުޅާދޫ، ފ.ނިލަންދޫ، ފ.ފީއަލި، ތ.ހިރިލަންދޫ، ގއ.ދާންދޫ، ގއ.ދެއްވަދޫ، ގއ.ގެމަނަފުށި، ގއ.ކޮލަމާފުށި، ގދ.ފިޔޯރީ، ގދ.ފަރެސްމާތޮޑާ އަދި ސ.ހިތަދޫއެވެ. އަދި އިތުރު ރަށްރަށުގައި އައިސްޕްލާންޓް ޤާއިމްކުރުމުގެ މަސައްކަތް އެކުންފުނިން ދަނީ ކުރަމުންނެވެ.

މި އަހަރު ނިމުމުގެ ކުރިން އިތުރު 15 އައިސް ޕްލާންޓެއްގެ މަސައްކަތް ފެށުމަށް ސަރުކާރުން ދަނީ ތައްޔާރު ވަމުންނެވެ.