މަސައްކަތްކުރާ ސަރުކާރު ހޮސްޕިޓަލްނޫން އިތުރު ތަނެއްގައި މަސައްކަތް ނުކުރާ ޑޮކްޓަރުންނަށް ހާއްސަ އެލަވަންސެއް ދިނުމަށް ސަރުކާރުން ނިންމައިފިއެވެ.

ސަރުކާރުން އިއްޔެވަނީ ސިއްޙީ ދާއިރާގައި މަސައްކަތްކުރާ މުވައްޒަފުންގެ މުސާރަ ބޮޑުކޮށް އޭގެ ތަފްސީލްތައް ހާމަކޮށްފައެވެ. އެގޮތުން ދިވެހި ޑޮކްޓަރުންގެ ތެރެއިން ރޭންކް 10 އަކަށްވުރެ މަތީގެ ޑޮކްޓަރުން، ސަރުކާރުގެ ހޮސްޕިޓަލް ފިޔަވާ އެހެންތަނެއްގައި މަސައްކަތް ނުކުރާނަމަ މުސާރައިގެ އިތުރުން ހާއްސަ އެލަވަންސެން ދިނުމަށް ވަނީ ނިންމާފައެވެ.

މި އެލަވަންސް ބޭނުންވާ ޑޮކްޓަރުން ވަޒީފާ އަދާކުރާ ސަރުކާރުގެ ހޮސްޕިޓަލްނޫން އިތުރު އެއްވެސް ތަނެއްގައި ހިދުމަތް ނުދިނުމަށް އެއްބަސްވުމެއްގައި ސޮއި ކުރަން ޖެހެއެވެ. އަދި މިގޮތުން ދޭނެ އެލަވަންސްގެ މިންވަރެއް ކަނޑައަޅާނީ ކޭސް ބައި ކޭސް އުސޫލުން ކަމަށް ސަރުކާރުން ވަނީ ހާމަކޮށްފައެވެ.

ދިވެހި ޑޮކްޓަރުންގެ ތެރެއިން ރޭންކް 10 އަކަށްވުރެ މަތިން ގިންތި ކުރެވިފައިވާ ޑޮކްޓަރުންނަށް އިއްޔެއާއި ހަމައަށް ލިބޭ މުސާރައަކީ އިތުރު ގަޑީގެ ފައިސާއާއި އެކު 55،675 ރުފިޔާއެވެ. އެހެންނަމަވެސް އަލަށް ހިޖުރަ ކުރި މުސާރައިގެ އޮނިގަނޑާއެކު އެފަދަ ފަރާތްތަކަށް ދެން ލިބޭނީ 66،702 ރުފިޔާއެވެ.

ސަރުކާރުން ބުނެފައިވަނީ ސިއްހީ ދާއިރާގެ މުސާރައަށް ގެނައި ބަދަލާއެކު ސިއްހީ ދާއިރާގެ 3710 މުވައްޒަފަކަށް މުސާރަ ބޮޑުވާނެކަމަށެވެ.