މިއަހަރުގެ މިހާތަަނަށް މިފްކޯއިން މަސްވެރިންނަށް 472 މިލިއަން ރުފިޔާ ދޫކޮށްފިއެވެ.

ސަރުކާރުގެ މަސްކުންފުނި މިފްކޯއިން ބުނީ މިއަހަރުގެ މިހާތަނަށް އެކުންފުނިން މަސްވެރިންނަށް 472 މިލިއަން ރުފިޔާ ދޫކޮށްފައިވާ ކަމަށެވެ. މިދިޔަ އަހަރުގެ މި މުއްދަތުގައި މިފްކޯއިން މަސްވެރިންނަށް ދޫކޮށްފައިވަނީ 402 މިލިއަން ރުފިޔާއެވެ.

ތަފާސްހިސާބުތައް ދައްކާގޮތުން މިއަަހަރުގެ ޖެނުއަރީމަހުގެ ފުރަތަމަ ދުވަހުން ފެށިގެން އޭޕްރީލްމަހުގެ 28 ވަނަ ދުވަހުގެ ނިޔަލަށް މިފްކޯގެ ސެންޓަރުތަކަށްވަނީ 28،456 ޓަނުގެ މަސް ކިރުވާފައެވެ. މިދިޔައަހަރުގެ އެ މުއްދަތުގައި މިފްކޯއަށް ކިރާފައިވަނީ 24992 ޓަނުގެ މަހެވެ.

MIFCO paid over MVR 25 million to fishermen the past week. With this the amount paid to fishermen in 2023 has surpassed MVR 472 million pic.twitter.com/R0v78B4Ka5

— MIFCO (@mifcomv) April 30, 2023

މިފްކޯގެ ސެންޓަަރުތަކުގެ ތެރެއިން ކޫއްޑޫއަށް އަހަރުގެ މިހާތަނަށްވަނީ 21،413 ޓަނުގެ މަސް ކިރުވާފައެވެ. އަދި އެންމެ މަދުން މަސް ކިރުވާފައިވާ އައްޑޫ ފިޝަރީޒް ކޮމްޕްލެކްސްއަށް ކިރުވާފައިވަނީ 3329 ޓަނުގެ މަހެވެ.

މަސްވެރިންގެ އަތުން މަސްގަންނަ މިންވަރު އިތުރުކުރުމަށްޓަކައި މިފްކޯއަށް ގެނައި އެންމެބޮޑު މަސްކިރާ ބޯޓް ޖަޒީރާ 103 މިހާރުވަނީ ރާއްޖެއަށް ގެނެސްފައެވެ.

ސަރުކާރުން ދަނީ މަސްވެރިންނަށް މަސް ކިރުމުގައި ދިމާވާ ދަތިތައް ހައްލުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިފްކޯއަށް މަސް ގަންނަ މިންވަރު އިތުރުކުރުމަށް އެކިއެކި މަޝްރޫއުތައް ދަނީ ހިންގަމުންނެވެ.

އޭގެތެރޭގައި ފެލިވަރުގައި 4000 ޓަނުގެ މަސް ރައްކާކުރެވޭނެ ކޯލްޑް ސްޓޯރޭޖަކާއި، ދުވާލަކު 200 ޓަނުގެ މަސް ގަނޑު ކުރެވޭނެ ބްރައިން ފްރީޒިންގ ފެސިލިޓީއެއް ޤާއިމްކުރުން ހިމެނެއެވެ.