އަންހެން ކުދިންނާއި އަންހެނުންނަށް ކުރާ އަނިޔާ ތަކާއި ދެކޮޅަށް އެންމެން ގުޅިގެން ވަރުގަދަ މަސައްކަތްތަކެއް ކުރަންޖެހޭ ކަމަށް އެމްއާރުއެމްގެ ރައީސް އަދި ކުރީގެ ރައީސް، އަލްއުސްތާޒު މައުމޫން އަބުދުލްގައްޔޫމް ވިދާޅުވެއްޖެއެވެ.

ސަރުކާރުގެ ކޯލިޝަންގައި ހިމެނޭ އެމްއާރުއެމްގެ ރައީސް، ރައީސް މައުމޫން މިއަދު ކުރެއްވި ޓުވީޓެއްގައި ވިދާޅުވީ، އަންހެންކުދިންނާއި އަންހެނުންނަށް ކުރާ ޖިންސީ ގޯނާ ކުރުމުގެ މައްސަލަތައް އިތުރުވުމަކީ ނިހާޔަތަށް ކަންބޮޑުވާންޖެހޭ ކަމެއް ކަމަށެވެ. އަދި މިއީ އިސްލާމްދީން ކަނޑައެޅިގެން ހަރާމް ކުރައްވާފައިވާ ކަމެއް ކަމަށް ރައީސް މައުމޫން ވިދާޅުވިއެވެ.

"އަދި އިޖްތިމާއީ ގޮތުން ވެސް ހުތުރުކަން ބޮޑު ލާއިންސާނީ އަމަލެއް، މިއީ މުޖުތަމައުން މުޅިން ލުހެލުމަށްޓަކައި އެންމެން ގުޅިގެން ވަރުގަދަ މަސައްކަތްތަކެއް ކުރަންޖެހޭ ކަމެއް." ރައީސް މައުމޫން ވިދާޅުވިއެވެ.

ދާދިފަހުން ސަފާރީއެއްގައި ބިދޭސީ އަންހެނަކު ރޭޕް ކުރި މައްސަލައިގެ ފަހުން ރޭޕާއި ޖިންސީ އަނިޔާއާއި ދެކޮޅަށް މާލެ ސިޓީގައި ސިލްސިލާ މުޒާހަރާތަކެއް ވެސް ވަނީ ފަށާފައެވެ. އޭގެ ފަހުން ކުޑަކުދިންނަށް ޖިންސީ ގޯނާ ކުރުމުގެ ގިނަ މައްސަލަތަކެއް ވަނީ ފެންމަތިވެފައެވެ. ރޭޕާއި ޖިންސީ ގޯނާ ފަދަ މައްސަލަތައް މުޖުތަމަޢުގައި ހިނގުން ހުއްޓުވުމަށް މަސައްކަތް ކުރުމުގެ ގޮތުން މިމަހުގެ މެދެއްހާތާގައި ޚާއްޞަ ކެމްޕޭނެއް ފަށަން ނިންމާފައިވާ ކަން ޖެންޑަރ މިނިސްޓަރު ވަނީ ދާދި ފަހުން އިޢުލާން ކުރައްވާފައެވެ