އައިޖީއެމްއެޗުން ކޯވިޑް-19 އަށް ޕޮޒިޓިވްވި މީހުންގެ ޖުމްލަ 11 އަށް އަރައިފިއެވެ.

މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އައިޖީއެމްއެޗްގެ ޑރ. އަލީ ނަޒީމް ވިދާޅުވީ، އައިޖީއެމްއެޗުން ޖުމްލަ 11 މީހަކު ކޯވިޑް-19 އަށް ޕޮޒިޓިވް ވެފައިވާ ކަމަށެވެ. އޭގެތެރޭގައި ދާދި ފަހުން މަރުވި ކެންސަރު ބައްޔަށް ފަރުވާ ހޯދަމުން ދިޔަ އިންޑޮނޭޝިއާ މީހާގެ އިތުރުން 4 ސްޓާފަކާއި 4 ބަލިމީހެއްގެ އިތުރުން އެހީތެރިންގެ ގޮތުގައި އުޅުނު 3 މީހުން ހިމެނޭ ކަމަށް ނަޒީމް ވިދާޅުވިއެވެ.

ކޮވިޑަށް ޕޮޒިޓިވްވި 4 ބަލިމީހުންގެ ތެރެއިން 2 މީހުން ވަނީ ދަރުމަވަންތަ ހޮސްޕިޓަލުގެ 11 ވަނަ ފަންގިފިލާއަށް ބަދަލު ކުރެވިފައި ކަމަށާއި ދެން ތިބި 2 މީހުން ވަނީ ހުޅުމާލެ މެޑިކަލް ފެސިލިޓީއަށް ބަދަލު ކުރެވިފައި ކަމަށް ނަޒީމް ވިދާޅުވިއެވެ.

މީގެ އިތުރުން މިހާތަނަށް އެ ހޮސްޕިޓަލުގެ 18 ނަރުހަކާއި 7 ޑޮކްޓަރަކާއި 2 ބަޔޯ މެޑިކަލް އިންޖިނިއާރުން ހިމެނޭގޮތަށް 27 ފަރާތެއް ހޯމް ކަރަންޓީން ކުރެވިފައިވާ ކަމަށާއި މިހާރުވެސް ވޯޑުތަކާއި ހޮސްޕިޓަލުގެ ތެރެއިން ކޮންޓެކްޓް ޓްރޭސިންގގެ މަސައްކަތް ކުރެވެމުން ދާ ކަމަށް ނަޒީމް ވިދާޅުވިއެވެ.

އައިޖީއެމްއެޗުން ޕޮޒިޓިވް ކޭސްތައް ފެނުމާއެކު ހޮސްޕިޓަލަށް ޒިޔާރަތް ކުރާ މީހުން އަމަލު ކުރަންޖެހޭ ގޮތާ ބެހޭ ގޮތުން ވާހަކަ ދައްކަވަމުން ޑރ. ނަޒީމް ވިދާޅުވީ، އުސޫލެއްގެ ގޮތުން އެމީހެއްގެ ރައްކާތެރިކަން ހޯދަން ޖެހޭނީ އެމީހަކު ކަމަށާއި، ނަމަވެސް ހޮސްޕިޓަލަށް މީހުން ޒިޔާރަތް ކުރުމާ އަދި ސްކްރީން ކުރުމުގެ ކަންކަން އިތުރަށް ވަރުގަދަ ކުރެވިފައިވާ ކަަމަށެވެ.

"މިހާރު އުސޫލްތަކަށް މިވަނީ ބަދަލުތަކެއް ގެނެސްފަ. ހުރިހާ އެޑްމިޝަންތައް މިހާރު ޓެސްޓް ކުރަމުންދާނީ. އެއީ މިހާރު ތިބި ޕޭޝަންޓުންނާއި އެޑްމިޓް ކުރާ ޕޭޝަންޓުންގެ ރައްކާތެރިކަމަށްޓަކައި. އެންމެންގެ ރައްކާތެރިކަމަށްޓަކައި މިއުސޫލަށް މިބަދަލުގެނައީ. އިތުރަށް ޕްރޮޓޮކޯލް ރަނގަޅުކުރެވޭނެ ގޮތް ޑޮކްޓަރުންނާއި ނަރުހުންނައި ގުޅިގެން ކޮލިޓީ އެޝުއަރެންސްއިން ބަލުމުންދަނީ." ޑޮކްޓަރ ނަޒީމް ވިދާޅުވިއެވެ.

އައިޖީއެމްއެޗުން މިއަދު ނެރުނު ބަޔާނެއްގައި ވަނީ، އެހޮސްޕިޓަލަށް ގެންނަ ހުރިހާ ޕޭޝަންޓުންވެސް ކޯވިޑް-19 އަށް ޓެސްޓްކުރުމަށް އެހޮސްޕިޓަލުން ނިންމާފައިވާ ކަމަށެވެ. ހަމައެއާއިއެކު ފަރުވާގެ ފެންވަރު ރަނގަޅު ކުރުމަށް ކުރާ މަސައްކަތުގެތެރެއިން އިމަރޖެންސީ ޙާލަތެއްގައި ކޯވިޑް-19 އަށް ޓެސްޓުކޮށް ނަތީޖާ ލިބެންދެން މަޑުނުކޮށް ރައްކާތެރިކަމުގެ ފިޔަވަޅުތަކާއެކު ކުރިއަށް އޮތްތަނުގައިވެސް އިމަޖެންސީ ފަރުވާދޭނެކަމުގެ ޔަގީންކަންދޭ ކަމަށް އެ ހޮސްޕިޓަލުން ބުނެއެވެ.

ކޯވިޑް-19އާއި ގުޅިގެން މާލޭގައި ޢިއުލާންކުރި ފުރަބަންދަށް 3 ވަނަ މަރުޙަލާގައި ލުއިތައް ދީފައިވާއިރު މިދުވަސްވަރުވެސް ޢާންމު ސިއްޙީ ރައްކާތެރިކަމަށް އިސްކަންދިނުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ.