ދިވެހިރާއްޖޭގެ ފަސް ވަނަ ޓޫރިޒަމް މާސްޓާ ޕްލޭން މިއަދު ނެރެފިއެވެ.

ޓޫރިޒަމް މާސްޓަރ ޕްލޭނަކީ ކުރިއަށް އޮތް 5 އަހަރު ދުވަހުގެ ތެރޭގައި ފަތުރުވެރިކަމުން ހާސިލްކުރަން ބޭނުންވާ ކަންކަމަށް އަލިއަޅުވާލެވިގެން ހަދާ ޕްލޭނެކެވެ. އެންމެ ފަހުން ޓޫރިޒަމްގެ މާސްޓަރ ޕްލޭން އެކުލަވާލީ 2013 ވަނަ އަހަރުއެވެ.

ދިވެހިރާއްޖޭގެ ގައުމީ ޔުނިވަރސިޓީގެ އޮޑިޓޯރިއަމްގައި މިއަދު ހެނދުނު ބޭއްވި ރަސްމިއްޔާތެއްގައި "ރާއްޖޭގެ ފަސްވަނަ ޓޫރިޒަމް މާސްޓަ ޕްލޭން 2023-2027" ނެރެދެއްވާފައިވަނީ އިޤްތިޞާދީ ވަޒީރު ފައްޔާޒު އިސްމާއީލެވެ.

ކުރީގެ ފަތުރުވެރިކަމާބެހޭ ވަޒީރު ޢަލީ ވަހީދު އިސްވެ ހުންނަވައިގެން އެކުލަވާލަށްވަން ފެއްޓެވި މި މާސްޓަރ ޕްލޭންގައި ވަނީ ފަތުރުވެރިކަމުގައި ރާއްޖެއާ ވާދަވެރި ގައުމުތަކާއެކު ކުރިއަށް ދިއުމަށް ކުރެވޭނެ ކަންކަން ހިމަނާފައެވެ. އޭގެ އިތުރުން އަތޮޅުތަކުގައި ފަތުރުވެރިކަން ފުޅާކޮށް، ލިބޭ އާމްދަނީގެ ފައިދާ މުޅި ރަށަށް ކުރާނެ ގޮތްތައް ބުނެދީފައިވެއެވެ.

ހަމައެއާއެކު ފަތުރުވެރިކަމުގެ ނަފާ އިތުރުކުރުމަށް ކުރެވޭނެ ގޮތްތަކާއި، ފަތުރުވެރިންނަށް ހިދުމަތްދޭ ތަންތަން އިތުރުކުރުމާއި، އާ ހިދުމަތްތަކާއި ތަޖުރިބާތަކުގެ ފުރުސަތު ފަހިކޮށްދިނުމަށް ކުރެވޭނެ ކަންކަން ހިމަނާފައިވެއެވެ. އަދި ފަތުރުވެރިކަމުގެ ދާއިރާގައި ހުރި މައްސަލަތަކާއި އެކަންކަން ހައްލު ކުރެވޭނެ ގޮތްތައްވެސް މި މާސްޓަރޕްލޭންގައި ހިމަނާފައިވެއެވެ.

އޭޝިއަން ޑިވެލޮޕްމަންޓް ބޭންކް (އޭޑީބީ) ގެ ހިލޭ އެހީގައި ޓޫރިޒަމް މިނިސްޓްރީން އެކުލަވާލި މި މާސްޓާ ޕްލޭންގެ މަަސައްކަތް ނިންމާލާފައިވަނީ ތިން އަހަރު ދުވަހުންނެވެ.