ދިރުވާލައިގެން ރާއްޖެއަށް މަސްތުވާތަކެތި އެތެރެކުރި ޕާކިސްތާންގެ ހަތަރު މީހަކު ހައްޔަރުކޮށްފި އެވެ.

އެމީހުންގެ ބަންދު އަމުރުތަކުގައިވާގޮތުން އެމީހުން ހައްޔަރުކޮށްފައިވަނީ ރާއްޖެއަށް މަސްތުވާތަކެތި އެތެރެކޮށް، އެ ތަކެތީގެ ވިޔަފާރިކުރާ ކަމުގެ ތުހުމަތުގައެވެ.

މި މައްސަލާގައި ހައްޔަރުކޮށްފައިވާ ފާކިސްތާނުގެ 4 މީހުންނަކީ މިސްބާހް ބީބީ އާއި ހަވާރް ހުސައިނާއި ޝަހްޒާދު ހުސެއިނާއި ނައީމް ތޯރިގެވެ.

ފުލުހުން ކޯޓުގައި ބުނެފައިވަނީ އެމީހުންގެ އަމަލުތައް ހުރިގޮތުން ދިރުވާލައިގެން މަސްތުވާތަކެތި އެތެރެކުރަން އުޅޭކަމަށް ޝައްކު ކުރެވިގެން އައިޖީއެމްއެޗަށް ގެންގޮސް، ސްކޭން ކޮށްފައިވާ ކަމަށެވެ. އަދި އެމީހުންގެ ހަށިގަނޑު ތެރޭގައި އެއްޗެހިތަކެއް ހުރިކަން ދެނެގަނެވުނު ކަމަށް ކޯޓުގައި ފުލުހުން ބުނެފައިވެއެވެ.

އެ ހަތަރު މީހުންގެ ބަންދަށް ކްރިމިނަލް ކޯޓުން ވަނީ ފަސް ދުވަސް ދީފައެވެ. އަދި ދޫނިދޫ މެޑިކަލް ކްލިނިކުން ދޫކޮށްލާ ވަގުތުން ފެށިގެން 24 ގަޑިއިރުގެ ތެރޭގައި އަލުން ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމަށް ކޯޓުން ވަނީ އަންގާފައެވެ.