އިންޑިއާގައި ހިނގި ނުރައްކާތެރި ރޭލު އެކްސިޑެންޓުގައި އެތައް ބަޔަކު މަރުވުމާއި ގުޅިގެން، އެ ޤައުމުގެ ބޮޑުވަޒީރު ނަރެންދުރަ މޯދީއަށާއި އެ ހާދިސާގައި މަރުވި މީހުންގެ އާއިލާތަކަށް ރައީސް އިބްރާހީމް މުޙައްމަދު ޞާލިޙު ތައުޒިޔާ ފޮނުއްވައިފިއެވެ.

ރައީސް ޞާލިޙު މިއަދު ވިދާޅުވީ، މި ހާދިސާގައި މަރުވި މީހުންގެ އާއިލާތަކަށް ތައުޒިޔާ ފޮނުއްވާ ކަމަށެވެ. އަދި ދިވެހި ރައްޔިތުންގެ ހެޔޮ ދުޢާ އިންޑިއާ ސަރުކާރާއި އެ ޤައުމުގެ ރައްޔިތުންނާއެކު ވާކަމަށް ރައީސް ވިދާޅުވިއެވެ.

މިދިއަ ހުކުރު ދުވަހު އިންޑިއާގެ އޮޑިޝާ ސްޓޭޓުގައި ހިނގި މި އެކްސިޑެންޓުގައި މަދުވެގެން 288 މީހުން މަރުވެ، 800 މީހުންނަށް އެކިވަރުގެ އަނިޔާވެފައިވެއެވެ. މި އެކްސިޑެންޓުގައި، އެއްރޭލު އަނެއް ރޭލާއި، ޖެހިފައިވާ ތިން ރޭލުގެ ތެރޭގައި ހިމެނެނީ ފަސިންޖަރުން އުފުލާ ދެ ރޭލާއި މުދާ އުފުލާ ރޭލެކެވެ.

މި އެކްސިޑެންޓް ހިނގަން މެދުވެރިވީ ސަބަބެއް އަދި ނޭގެއެވެ. ރިޕޯޓުތައް ބުނާ ގޮތުން މި ގަރުނުގައި އިންޑިއާގައި މި ފަދަ ހިތާމަވެރި ރޭލު އެކްސިޑެންޓެއް ހިނގާފައެއް ނުވެއެވެ.