އިންޑިއާގައި ހިނގި ނުރައްކާތެރި ރޭލު އެކްސިޑެންޓުގައި އެތައް ބަޔަކު މަރުވުމާއި ގުޅިގެން، އެ ޤައުމުގެ ބޮޑުވަޒީރު ނަރެންދުރަ މޯދީއަށާއި އެ ހާދިސާގައި މަރުވި މީހުންގެ އާއިލާތަކަށް ޖުމްހޫރީ ޕާޓީގެ ލީޑަރ އޮނަރަބަލް ޤާސިމް އިބްރާހިމް ތައުޒިޔާ ފޮނުއްވައިފިއެވެ.

ޤާސިމްގެ ތަޢުޒިޔާގެ މެސެޖުގައި ވިދާޅުވެފައިވަނީ އިންޑިއާގައި މިދިޔަ 20 އަހަރުގެ ތެރޭގައި ހިނގި އެންމެބޮޑު ރެއިލްވޭ އެކްސިޑެންޓުގައި ނިޔާވި އެންމެންގެ ޢާއިލާތަކަށާއި އިންޑިއާ ސަރުކާރުގެ ވެރިންނަށް ތަޢުޒިޔާ ފޮނުއްވާކަމަށެވެ. އަދި މިޙާދިސާގެ ޚަބަރު އަޑުއެއްސެވީ ނުހަނު ފުން ހިތާމައާއި އެކުގައި ކަމަށް ޤާސިމް ވިދާޅުވެފައިވެއެވެ.

މި އެކްސިޑެންޓް ހިނގާފައިވަނީ މީހުން އުފުލާ ރޭލެއް ދަގަނޑުމަތީން ކަހާލައިގެން ގޮސް އިތުރު ދެ ރޭލެއްގައި ޖެހިގެންނެވެ. މިއީ އިންޑިއާގައި ވޭތުވެދިޔަ 20 އަހަރުތެރޭ ހިނގި އެންމެ ނުރައްކާތެރި ރޭލު އެކްސިޑެންޓެވެ.

މި ހިތާމަވެރި ހާދިސާގައި 288 މީހުން މަރުވެފައިވާ ކަމަށް ރިޕޯޓްތައް ބުނެއެވެ. އަދި ހާހަކަށްވުރެ ގިނަ މީހުން ޒަޚަމްވެފައިވެއެވެ.