އާރްސީސީގެ މުވައްޒަފުން މުސާރަ ނުދީގެން މުޒާހަރާ ކުރާކަމަށް ބުނެ  ދޮގު ޚަބަރު ފެތުރި މައްސަލަ ފުލުހަށް ހުށައަޅުއްވާނެ ކަމަށް އެކުންފުނީގެ ޗެއާމަން އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު ކާނަލް ރިޓަޔާޑް މުހައްމަދު ނާޒިމް މިރޭ ވިދާޅުވެއްޖެއެވެ.

އާރްސީސީގެ މުވައްޒަފުން މުސާރަ ނުދީގެން މުޒާހަރާ ކުރާކަމަށް ބުނެ ފަތުރާފައިވަނީ ދޮގު ހަބަރެއް ކަމަށް އެ ކުންފުނިން ވަނީ ބުނެފައެވެ. އާރްސީސީ އިން ބުނީ އެކުންފުނީގެ މުވައްޒަފުންގެ ވޯކް ވިސާ ކާޑު ހެދުމަށް ބޭނުންވާ ފޮޓޯ ނެގުމަށް މާފަންނުގައި ހުންނަ ފޮޓޯނަގާ ތަނެއްކަމަށްވާ ފޮޓޯ ފްރެންޑު ކައިރީ ކިޔުހަދާފައި ތިއްބާ އެމީހުން މުޒާހަރާކުރަނީ ކަމަށް ބުނެ ކުންފުނީގެ އަގުވެއްޓޭގޮތަށް ސޯޝަލް މީޑިއާގައި ދޮގު ހަބަރު ފަތުރާފައިވާ ކަމަށެވެ.

އެ ކުންފުނީގެ ޗެއާމަން އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު ކާނަލް ރިޓަޔާޑް މުހައްމަދު ނާޒިމް ކުރެއްވި ޓްވީޓެއްގައި ވިދާޅުވީ އެ ކުންފުނީގެ އަގުވައްޓާލުމަށް "މިނިވަން ނޫސްވެރިކަމުގެ ނަމުގައި" ފެތުރި ދޮގު ހަބަރު ފުލުހަށް ހުށަހަޅާނެ ކަމަށެވެ.

ބިދޭސީ މުވައްޒަފުން ލައްވާ މަސައްކަތް ކުރުވުމަށްފަހު މުސާރަ ނުދޭ މައްސަލަ ވަނީ ވަރަށް ބޮޑަށް ހޫނުވެފައެވެ. އެފަދަ މައްސަލަ ތަކުގައި ބިދޭސީން ހަޅުތާލުކޮށް ހަމަނުޖެހުން ހިންގާ މުދަލަށާއި ތަކެއްޗަށް ގެއްލުން ދެމުން ދިއުން ފަދަ މައްސަލަތައްވެސް މިހަރު ދަނީ ފެންމަތިވަމުންނެވެ.

އެގޮތުން ބ. ބޮޑުފިނޮޅުގައި މަސައްކަތްކުރާ ބިދޭސިންތަކެއް މުސާރައިގެ މައްސަލާގައި ހަމަނުޖެހުން ހިންގާފައިވާއިރު ހުޅުމާލޭގައި މަސައްކަތްކުރާ ބިދޭސިންތަކެއް ވެސް މިއަދު ވަނީ މުސާރައިގެ މައްސަލާގައި މުޒާހަރާކޮށް ހަމަނުޖެހުންތަކެއް ހިންގާފައެވެ. ކޮންސްޓްރަކްޝަން އަދި ކާޕެންޓްރީގެ މަސައްކަތް ފުޅާދާއިރާއެއްގައި ކުރާ އާރްސީސީގެ މުވައްޒަފުންގެ ގޮތުގައި ގިނަ އަދަދެއްގެ ބިދޭސިން ހަރާކާތްތެރިވެއެވެ.