ރާއްޖެއަށް މިހާރު ކުރަމުންދާ ވިއްސާރައިގައި ރާއްޖޭގެ 13 ރަށަކަށް ގެއްލުންތަކެއް ވެފައިވާ ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ހާމަކޮށްފިއެވެ.

އެމްޑީއެމްއޭ އިން ބުނީ މިހާރު ކުރަމުންދާ ވިއްސާރާގައި ގެއްލުންވި ރަށްތަކުގެ ތެރޭގައި ބ. މާޅޮސް، ޅ. ނައިފަރު، ހއ. އިހަވަންދޫ، ށ. ފުނަދޫ، ށ. ފީވައް، ށ. ކޮމަންޑޫ، ހދ. ކުޅުދުއްފުށި، ކ. މާފުށި، ކ. ތުލުސްދޫ، ކ. ދިއްފުށި، ކ. ހުރާ، ފ. ފީއަލި އަދި އއ. ފެރިދޫ ހިމެނޭ ކަމަށެވެ.

ވިއްސާރައިގެ ސަބަބުން ބ. މާޅޮހުން ތިން ގެޔަކަށް ވަނީ ފެންވަދެފައެވެ. އަދި ޅ. ނައިފަރުގެ ދެ ގެއެއްގެ ވަށާފާރު ވެއްޓިފައިވާއިރު، ގެއެއްގެ ފުރާޅު ވަނީ އެއްލާލާފަ އެވެ. ހއ. އިހަވަންދޫ ގެއެއްގެ ފުރާޅު އެއްލާލާފައިވާއިރު ގެއެއްގެ އިންފާރު ވެއްޓިފައިވާ ކަމަށްވެސް އެންޑީއެމްއޭއިން ހާމަކޮށްފައިވެއެވެ.

އޭގެއިތުރުން ށ. ފުނަދޫގެ ބަނދަރުގެ ހުރި ހަޓެއް ހަލާކުވެފައިވާއިރު، ފީވަކު ގެއެއްގެ ފުރާޅު ވަނީ އެއްލާލާފަ އެވެ. ހަމައެއާއެކު ކޮމަންޑޫއަށް ބޯކޮށް ވާރޭ ވެހުމުގެ ސަބަބުން ރަށު ތެރޭގައި ފެންބޮޑުވެ، ގެއެއްގެ ހިފާގެންގުޅޭ ތަކެއްޗަށް ވަނީ ގެއްލުން ލިބިފައެވެ.

ވައިގަދަވުމުގެ ސަބަބުން ކ. ހުރާ، މާފުށި، ދިއްފުށި އަދި ތުލުސްދޫގައި ރުށްގަސް ވެއްޓުމުގެ ހާދިސާތައް ހިނގާފައިވެ އެވެ. ހަމައެއާއެކު ފ. ފީއަލީ, އއ. ފެރިދޫ އަދި ހދ. ކުޅުދުއްފުއްޓަށް ވެސް އެކިވަރުގެ ގެއްލުންތައް ވަނީ ލިބިފަ އެވެ.

އެމްޑީއެމްއޭ އިން ބުނީ ވިއްސާރާގައި ގެއްލުންވި ރަށްތަކުގެ ކައުންސިލުތަކާއި ގުޅިގެން އެ ރަށްތަކަށް އެހީތެރިކަން ފޯރުކޮށްދެމުން އަންނަ ކަމަށެވެ.

މިދުވަސްވަރު މޫސުން ގޯސްވެ، ވައިގަދަވާނެ ކަމަށާއި މިއަދާއި މާދަމާ ބައެއް ރަށްރަށަށް އުދަ އަރާފާނެތީ ރައްކާތެރިވެ ތިބުމަށް މެޓް އޮފީހުން ވަނީ އިލްތިމާސްކޮށްފައެވެ.