މާގިރި ހޮޓަލުގެ ސީސީޓީވީ ރިކޯޑިންގ އެއްވެސް މީޑިއާ އަކާއި ހިއްސާކޮށްފައި ނުވާނެ ކަމަށް އެ ހޮޓަލުން ބުނެފިއެވެ.

ބަދުއަޚްލާޤީ މައްސަލަތަކަކާއި ގުޅިގެން ފަތުރުވެރިކަމާ ބެހޭ ވަޒީރުގެ މަޤާމުން ޢަލީ ވަޙީދު ވަކިކޮށްފައިވާއިރު، ފުރަބަންދުގެ ދުވަސްތަކުގައި ފަތުރުވެރިކަމާބެހޭ ވުޒާރާގެ ބައެއް މުވައްޒަފުންނާއެކު ޢަލީ ވަޙީދު ދިރިއުޅުއްވަމުން ގެންދެވީ މާގިރި ހޮޓަލުގައެވެ.

މީގެ ކުރިން މާގިރި ހޮޓަލުގެ ސީސީޓީވީ ފޫޓޭޖްތައް ލިބިފައިވާކަމަށް ބުނެ ރާއްޖޭގެ ބައެއް މީޑިއާތަކުން ވަނީ ޢަލީ ވަޙީދު މާގިރި ހޮޓަލުގައި ލޮކްޑައުން ވެގެން އުޅުއްވި ދުވަސްވަރުގެ ސީސީޓީވީ ފުޓޭޖުން ފެންނަ ބައެއް މަންޒަރުތައް ސިފަކޮށްދީ ލިޔުންތައް ގެނެސްދީފައެވެ.

އެކަމާ ގުޅިގެން މާގިރި ހޮޓަލުން ނެރެފައިވާ ބަޔާނެއްގައި ވަނީ، އެ ހޮޓަލުން އެންމެ އިސްކަމެއްދެނީ ކަސްޓަމަރުންގެ ޕްރައިވެސީ ރައްކާތެރިކޮށްދިނުމަށް ކަމަށާއި، އެ ހޮޓަލުގެ އެއްވެސް ސީސީޓީވީ ފޫޓޭޖެއް އެއްވެސް ޢާއްމު ފަރުދަކަށްވެސް އަދި މީޑިއާ އެޖެންސީއަކަށްވެސް ޙިއްސާކޮށްފައި ނުވާނެ ކަމަށެވެ. އަދި އެ ހޮޓަލުގެ ސީސީޓީވީ ފޫޓޭޖްތަކުން ފެންނަ މަންޒަރުތައް ކަމަށް ބުނެ މީޑިއާތަކުން ފަތުރަމުން ގެންދަނީ ދޮގު ވާހަކަތަކެއް ކަމަށް އެ ހޮޓަލުން ވަނީ ބުނެފައެވެ.

PRESS RELEASE

Maagiri Hotel wishes to inform the PUBLIC that the Hotel is committed to ensuring privacy of its guests, and have NOT shared footages of its CCTV recordings to any INDIVIDUAL or MEDIA AGENCY. Any information to the contrary in the media is false.

— Maagiri Hotel (@MaagiriHotel) July 10, 2020

މާގިރި ހޮޓަލުން އިތުރަށް ބުނީ، އެ ހޮޓަލާ ބެހޭ ގޮތުން ދޮގު ޚަބަރާ މަޢުލޫމާތު ފެތުރި ވަކިވަކި ފަރުދުންނާއި، މީޑިއާތަކާ ދެކޮޅަށް ޤާނޫނީ ފިޔަވަޅު އަޅާނެ ކަމަށެވެ.