ސިވިލް ސަރވިސް ކޮމިޝަންގެ ރައީސް ޑރ.ޢަލީ ޝަމީމް އިސްތިއުފާ ދެއްވާފައި ވަނިކޮށް ކޮމިޝަންގެ މެމްބަރު ޒަކަރިއްޔާ ޙުސައިންވެސް ކޮމިޝަނުން އިސްތިއުފާ ދެއްވަފައިފިއެވެ.

މަޖިލިސް ޖަލްސާގައި މިއަދު ވާހަކަ ދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ ސިވިލްސާވިސް ކޮމިޝަންގެ ރައީސް އަލީ ޝަމީމް މަޤާމުން އިސްތިއުފާ ދެއްވާފައިވާކަން މަޖިލީހަށް އަންގަވާފައިވާކަމަށެވެ. އަދި ކޮމިޝަންގެ ރިޕޯޓަށް ބަހުސް ކުރަން އުޅެނިކޮށް ކޮމިޝަންގެ މެމްބަރު ޒަކަރިއްޔާ ޙުސައިންވެސް މަޤާމުން އިސްތިއުފާ ދެއްވާފައިވާކަން ހާމަކޮށްފައިވާކަމަށް ރިޔާސަތުން އިޢުލާން ކުރެއްވިއެވެ. އެހެންކަމުން މިނިވަން މުވައްސަސާތަކާއި ބެހޭ ކޮމިޓީން ސީސީއެސްސީގެ 4 މެމްބަރުން ވަކިކުރުމަށް ނިންމާފައިވާ ކޮމިޓީރިޕޯޓުން ޝަމީމްއާއި، ޒަކަރިއްޔާގެ ނަން އުނިވާނެކަމަށް މަޖިލިސް ރައީސް ވިދާޅުވިއެވެ.

ސިވިލްސާވިސް ކޮމިޝަނުން ވަކިކުރުމަށް ކޮމިޓީން ނިންމާފައިވަނީ އެ ކޮމިޝަނުގެ ރައީސް ޑރ.ޢަލީ ޝަމީމާއި، ނާއިބު ރައީސް ޝަހީދު މުޙައްމަދާއި މެމްބަރު ޒަކަރިއްޔާ ޙުސައިނާއި މެމްބަރު އިބްރާހީމް ޝަހީޤެވެ. މިބޭފުޅުންނާއި ގުޅޭގޮތުން މިނިވަން މުއައްސަސާތަކާބެހޭ ކޮމިޓީން ބަލާފައި ވަނީ މައިގަނޑު 5 މައްސަލައެކެވެ. ކޮމިޝަނުން ވަކިކުރަން ނުފެންނަކަމަށް ނިންމާފައިވަނީ ކޮމިޝަންގެ މެންބަރު އާމިރާ އެކަންޏެވެ.

އާމިރާ ފިޔަވައި ދެންތިއްބެވި 4 މެމްބަރުން ވަކިކުރުމަށް މިނިވަން މުއައްސަސާތަކާ ބެހޭ ކޮމިޓީން ނިންމާފައިވަނީ މިދިޔަ މަހުގެ 29 ވަނަ ދުވަހުއެވެ. މިއަދުގެ ޖަލްސާގައި ކޮމިޓީގެ ރިޕޯޓް ހުށަހަޅައި ބަހުސްއަށްފަހު ވޯޓަށް އަހާނެކަމަށް ބެލެވެއެވެ.